Монгол Улсын иргэнд газар өмчлүүлэх тухай хууль хэрэгжиж эхэлснээс хойшхи арван жилийн хугацаанд нийслэлийн иргэдийн найман хувь нь газар өмчилж авчээ. Тиймээс 2013 онд гэр бүлийн хэрэгцээний зориулалтын 52 байршлын 15309 га бүхий газрыг НИТХ-аас иргэнд өмчлүүлэхээр тогтоосон юм. Уг тогтоолын дагуу 164 мянга 620 орчим иргэнд шинээр газар өмчлүүлэх аж.  Энэ жилээс газар өмчлөх хүсэлтийг цахимаар хүлээн авч, сугалааны журмаар олгох бөгөөд ирэх сарын 1-ний өдрөөс эхлүүлэх төлөвлөгөөтэй байгаагаа албаны хүмүүс мэдэгдсэн. Ингэхдээ шинээр газар өмчилж авахыг хүссэн иргэд дүүргийн Өмч, газрын харилцааны  албанд заавал өөрийн биеэр очих шаардлагагүй, нийслэлийн өмчийн харилцааны газрын  (www.umch.ub.gov.mn) цахим хуудсанд хандан сонгон шалгаруулалтад оролцох гэнэ. Харин хүсэлтийн хариу гарсаны дараа газар өмчлөлийн гэрчилгээгээ өөрийн биеэр очиж авах ёстой юм байна.