Дорнодын талыг там болгосон гэгддэг "Петро Чайна Дачин Тамсаг" компанийн газрын тос ачиж явсан найман машин шатаж, дэлбэрсэн хэргийн талаар Онцгой байдлын ерөнхий газрын дарга Т.Дуламдорж, Газрын тосны дарга Г.Өлзийбүрэн нар дэлгэрэнгүй мэдээллийг өглөө. "Петро Чайна Дачин Тамсаг" компанийн хувьд Дорнод аймгийн Матад сумын нутагт газрын тос олборлодог. Харин өчигдөр болсон осол шөнийн 20:48 цагийн орчимд газрын тос ачих үед гарсан байна. Хэрэг гарах үед 10 машин тос ачиж байсан аж. Үүний найман нь шатжээ. Галын шалтгаан одоогоор тодорхойгүй бөгөөд ачилт хийж байсан 10 машины баруун захаас гурав дахь машинд хамгийн эхэнд гал гарч, дэлбэрсэн байна. Осол гарах үед ээлжийн оператор Цэдэнзэлэм ачилтын шахуургыг яаралтай хаасан тул тос алдагдаагүй байна.
Ослын улмаас БНХАУ-ын хоёр иргэн амиа алдсан байна. Тус хоёр иргэн нь Петро Чайна Дачин Тамсаг компанийн ажилчид юм. Мөн Хятадын “CNPC” компанид жолоочоор ажиллаж байсан 40 орчим насны эрэгтэй түлэгдэлтийн улмаас Бичигтийн боомтоор дамжин өмнөд хөрш рүү хүргэгджээ. Аврах ангийхан шөнийн 02.30 цагийн орчимд галыг унтраасан ч одоогоор бага зэргийн шаталт үргэлжилж байгаа аж. Ослын улмаас ил байгууламжийн зөвхөн ачилтын хэсэг шатсан бөгөөд бусад газарт ямар нэгэн осол гараагүй гэлээ.
Одоогийн байдлаар “Дачин Тамсаг” компанийн ажлыг бүрэн зогсоосон бөгөөд ослын газарт цагдаа, хууль хяналтын байгуулланыхан ажиллаж байгаа гэж албаныхан хэллээ.
Т.Энхэлээ
Сэтгэгдэл (7)