Аймаг, нийслэлийн Иргэдийн төлөөлөгчдийн хурлын шийдвэр, тухайн орон нутгийн байгаль, цаг уурын онцлог, энэ онд цэргийн албанд татах цэргийн насны залуучуудын тоо зэргийг харгалзан 2014 онд улсын хэмжээнд цэргийн алба дүйцүүлэн хаалгах тооны дээд хязгаарыг тоолоо.

Харин цэргийн дүйцүүлэх албыг мөнгөн төлбөрийн хэлбэрээр орлуулан хаах иргэний төлбөрийн хэмжээ нь 4 сая 413 мянга 314 төгрөг байхаар баталлаа. Энэ нь хугацаат цэргийн нэг алба хаагчийн хангамж, үйлчилгээний заардлын тооцоонд үндэслэсэн дүн юм. Тухайлбал, хүнс, хувцас, орон байр, эмнэлэг үйлчилгээ, сургалт, соёл, захидал харилцаа, үзвэр, цалин, нийгмийн даатгалаас гадна сум, галт хэрэглэл, шатах, тослох материалын зардлыг оруулан тооцдог.

Иргэд цэргийн дүйцүүлэх албыг мөнгөн төлбөрийн хэлбэрээр орлуулан хааснаас орсон орлогыг “Монгол Улсын Иргэний цэргийн үүргийн болон цэргийн албан хаагчдын эрх зүйн байдлын тухай” хуульд заасны дагуу 50 хувийг орон нутгийн төсөвт, үлдсэнийг улсын төсөвт төвлөрүүлдэг.

Засгийн газрын тогтоолын хэрэгжилтэнд хяналт тавих, дүйцүүлэх албыг зохих журмын дагуу хаалгах, орлуулан хаагчдын мөнгөн төлбөрийг төлүүлэх арга хэмжээ авч ажиллахыг Батлан хамгаалах, Сангийн сайд нар болон аймаг, нийслэлийн Засаг дарга нарт Засгийн газраас үүрэг болголоо.