ШӨХТГ-аас “АСА” циркт хандан шаардлага хүргүүлсэн талаараа мэдээлсэн. Тэгвэл өнөөдөр  мэргэжлийн сүмогийн их аварга Д.Дагвадорж хэвлэлийн хурал хийлээ.

 Тэрбээр "ШӨХТГ-аас үйл ажиллагааг нь нягтлалгүй сенсаци дэгдээж байгаад харамсаж байна. Түүгээр ч зогсохгүй О.Магнай хувийн өмчид халдаж, энэ асуудалд хувийн амбицаар хандаж байгаа учраас тэмцэнэ. “АСА" циркийг анх авч байхад дээрээ гуравхан ёлтойсон гэрэлтэй, хэдэн мал ан амьтан нь хөгширчихсөн байсан. Одоо ямар болсныг хар. Би нийгмийн хариуцлагатай, Монголоо гэсэн сэтгэлтэй монгол хүн. ШӨХТГ бидний үйл ажиллагаатай танилцаагүй байж бэлтгэл сургуулилт, тоглолт байхгүй, 60 гаруйхан уран бүтээлчидтэй үлдсэн гэх мэтээр гүтгэсэн. Өнөөдөр манайх 135 уран бүтээлч өдөр бүр бэлтгэл сургуулилтаа хийгээд тоглолтоо үзэгч олноо толилуулаад явж байна. Өнгөрөгч 2013 оны ажлын гүйцэтгэлээс харвал ганцхан жилийн дотор 41 уран бүтээлийг бэлтгэж нийтдээ 82 удаа үзэгч олонд хүргэсэн байна. Үүнийг юм хийгээгүй гэх үү. Бид циркийг хувьчилж аваад урлаг соёлын талаасаа пи-ар л дутсан уу гэхээс хийсэн ажил бол дутахгүй. Ингэж бидний хийсэн ажлыг үгүйсгэж, харыг цагаанаар будаж байгаад харамсаж байна. О.Магнай өөрөө үзээгүй байж манайд ийм алдаатай шаардлага хүргүүлчихээд сууж байна. Төрийн ажлыг ингэж хийхгүй ээ. Төрийн ажлыг хувийнхаа амбицад ашиглахгүй шүү, Намайг хорь гаруйхан настай Монгол Улсынхаа нэр хүндийг тив дэлхийд цуурайтуулаад ирэхэд О.Магнай дүү юу хийж байсан юм. Зодог тайлаад ирэхэд талбай дээр олон хүн цугларахад тэрийг далимдуулаад хөдөлгөөн өрнүүлээд явж байсан. Жижигхэн тойрогт пи-ар хийж болохгүй. Хүн амьтныг өдөөн хатгасан ийм үйлдэл хийж болохгүй. Дахиад хэлье цирк циркээрээ байгаа. Цирк циркээрээ үйл ажиллагаа явуулж байгаа. Цирк циркээрээ байх болно. Би үхвэл л юу юм гэхээс. Тиймээс би О.Магнай болоод компанийн хувийн нууц руу халдсан хүмүүсийг Захиргааны хэргийн шүүхэд аваачиж өгнө" гэв.