Олон улсын нийгмийн ажилтны өдөр Европын орнуудаас эхэлсэн түүхтэй бөгөөд жил бүрийн 3 сарын 17-19-ны хооронд хөдөлгөөнтэйгээр тэмдэглэдэг уламжлалтай. Энэ жил тус Олон улсын өдрийг “Нийгмийн эдийн засгийн хямрал-нийгмийн ажлын шийдэл” уриан дор тэмдэглэхээр шийдвэрлэсэн байна. Олон Улсын Сургуулийн Нийгмийн Ажилтны Нийгэмлэг нь 1928 онд Европын 51 орны сургуулийн нийгмийн ажилтнуудын хүсэл тэмүүллээр байгуулагдсан. Хүний эрхийг 5 тивд түгээн сурталчлах, дэлхийн боловсролын хөгжилд сургуулийн нийгмийн ажил, нийгмийн ажилтнуудын мэргэжлийн үйлчилгээг хөгжүүлэх зорилготой ажилладаг.
Хүүхдийн эрх ашиг ноцтой зөрчигдөж, хүүхдүүд олноороо сургууль завсардаж байсан 1990-ээд оны эцсээр Их Британий Хүүхдийн Ивээх Сангийн санаачлага, дэмжлэгээр нийгмийн ажил Монгол оронд хөгжих эхлэлээ тавьж, анхны нийгмийн ажилтнууд ЕБС-д ажиллаж эхэлсэн юм.
2000 оны 04-р сарын 10-ны өдрийн Гэгээрлийн сайд, Эрүүл мэнд, Нийгмийн хамгааллын сайдын хамтарсан 73/90 тоот тушаалаар сургуулийн нийгмийн ажилтны ажлын байрны тодорхойлолт батлагдаж сургуулиуд дээр албан ёсоор ажиллаж эхэлснээс хойш арван долоон жил болж байна.
Монголын Сургуулийн Нийгмийн Ажилтны Нийгэмлэг дэлхийн улс орнуудтай хөл нийлүүлэн энэхүү өдрийг Монгол Шведийн Хамтын Нийгэмлэгтэй хамтран тэмдэглэх бөгөөд Нийслэлийн сургуулийн нийгмийн ажилтнуудад зориулан “Нийгэм ба багшийн хөгжил” сургалтыг Дэлхийн Зөн-Монгол ОУБ-ын дэмжлэгтэйгээр маргааш нөгөөдөр буюу 14, 15-ны өдрүүдэд Сүнжингранд зочид буудалд зохион байгуулна.
24tsag.mn
