Өнгөрсөн сарын 27-28-ны өдрүүдэд Франц улсын нийслэл Парис хотноо зохион байгуулагдсан Эдийн засгийн хамтын ажиллагаа, хөгжлийн байгууллагаас /OECD/ зохион байгуулсан Олон Улсын Өрсөлдөөний байгууллагуудын жил тутмын тайлангийн хуралд Шударга өрсөлдөөн, хэрэглэгчийн төлөө газрын Өрсөлдөөний зохицуулалтын хэлтсийн дарга Л.Ган-Өлзий оролцоод ирлээ. Дэлхийн 102 улс, олон улсын байгууллагуудын 200 гаруй төлөөлөгчид оролцсон уг чуулганаар өрсөлдөөнд үзүүлэх авлигын нөлөөлөл болон эм, эмнэлэгийн хэрэгслийн үйлдвэрлэл худалдаан дахь өрсөлдөөний асуудлыг хэлэлцсэн байна. Чуулганаас авлигын эдийн засгийн хөгжил, шударга өрсөлдөөнд үзүүлэх хор уршгийг арилгах, шударгаар өрсөлдөхийн оронд авлига өгч асуудлыг шийдвэрлэдэг аж ахуй эрхлэгчидтэй хатуу тэмцэл явуулах, эм, эмнэлэгийн хэрэгслийн үнийг чөлөөлөх, эм, эмнэлэгийн хэрэгслийн үйлдвэрлэгч, худалдаалагч болон эмнэлгийн байгууллагуудын хооронд үгсэн хуйвалдах зөрчил гарч болзошгүй байдалд анхаарч ажиллах зэрэг зөвлөмжийг дэлхийн бүх улс орнуудын өрсөлдөөний байгуулагуудад өглөө.