Нийслэлийн мэргэжлийн хяналтын газрааас тээврийн хэрэгсэл, явган зорчигчийн зам дээр зохих зөвшөөрөлгүй худалдаа, үйлчилгээ явуулж байгаа иргэд, аж ахуйн нэгж байгууллагын үйл ажиллагааг зогсоож, илэрсэн зөрчил дутагдлыг арилгуулж, хяналт тавьж  ажиллах зорилгоор хяналт шалгалтыг явуулж байна.

Шалгалтыг Байгаль орчны хяналтын болон дүүргүүд дэх Мэргэжлийн хяналтын хэлтсийн хүнсний чанар, аюулгүй байдлын хяналтын, мал амьтан, хорио цээр, чанарын хяналтын, хөдөлмөрийн эрүүл ахуйн хяналтын, байгаль орчны хяналтын, эрүүл ахуй, халдвар хамгаалалын хяналтын 24 улсын байцаагч, дүүргүүд дэх цагдаагийн хэлтсийн Хэв журам хамгаалах тасгийн нийт 12 алба хаагчид хамтран 03 дугаар сарын 10-ны өдрөөс эхэлсэн байна

Шалгалтанд удирдамжийн хавсралт судалгаанд нэр заагдсан болон судалгаанд хамрагдаагүй тээврийн хэрэгсэл, явган зорчигчийн зам дээр зохих зөвшөөрөлгүй нүүрс худалдаалдаг портер машинтай 7 иргэн, 25 ТҮЦ, ил задгай гудамж дагуу худалдаа эрхлэгч 11 иргэн, нүүрс борлуулдаг 13 иргэн, дугуй засварын 18 цэг, гутал засварын 1 цэг, тос тосолгооны 1 цэг, хоёрдогч түүхий эдийн 1 цэг, хүнсний 2 дэлгүүр, “Го-Го” тахианы 2 цэг,  нийт 80 газар хамрагджээ.

Шалгалтаар 2 хүнсний дэлгүүрт 8 заалт бүхий албан шаардлага, 75 цэгт үйл ажиллагааг зогсоох, нүүх тухай мэдэгдэл хүргүүлж ажилласан байна. Сүхбаатар дүүрэг дэх МХХэлтэс дүүргийнхээ Засаг даргын тамгын газрын Тохижилт, худалдаа, үйлдвэр үйлчилгээний хэлтэс, Цагдаагийн хэлтэстэйгээ хамтран дугуй засварын болон хоёрдогч түүхий эд худалдан авах 3 газрыг нүүлгэсэн байна.