Өнөөдөр Ерөнхийлөгч Ц.Элбэгдорж Төрийн ордонд салбар, салбартаа ажил үйлсээрээ манлайлсан хүмүүст шагнал гардууллаа. Үүнд урлаг, спорт, боловсрол, эрүүл мэнд,  худалдаа, аж үйлдвэр зэрэг салбарын хүмүүс багтсан юм.

Энэ үеэр шагнал авсан хүмүүсийн сэтгэгдлийг сонслоо.

СГЗ Ц.Хулан: Хүн шагналд их дуртай байдаг юм байна

-Хүн цаг мэдээ сонсолгүй алс холын замд гараад явж байхад тэнгэрээс хур бороо орж, солонго татахад их бэлэгшээдэг би их бэлэгшээж байна. Ер нь хүн шагналд дуртай байдаг юм байна. Би өмнө нь шагнал авч байсан. Энэ удаагийн шагналд үнэхээр их баярлаж байна. Намайг дэмждэг уншигчдадаа баярлалаа. Яруу найраг утга зохиол, соёл урлагийн амьдралд маань үргэлж сэтгэлээр дэмнэж байсан эрхэм сайхан та бүхэндээ их талархаж байна. Яруу найргийн шилдэг түүвэр болон “Зүгээр л нэг амьдрахсан” номууд маань намайг СГЗ цол авахад ойртуулж өгсөн болов уу.


СГЗ Д.Цоодол: Ц.Хулангийн зөв байсан байна

-Ийм хүнд хэцүү зам руу орж зоригтой, тууштай явсан охиндоо их баярлаж байна. Би гэж гэр орны ажилд оролцдоггүй танхай хүн. Миний охин энэ ажил руу орчихоор яадаг юм болдоо гэж бодож байсан. Гэхдээ Ц.Хулангийн зөв байсан байна.


МУГЖ Н.Төмөрхуяг: Үлгэр жишээ яваарай гэж Ерөнхийлөгч захисан

-Төр засаг маань бид нарыг мартдаггүй юм байна. 30 гаруй жил дууллаа. Тэгээд өнөөдөр ардчилсан Ерөнхийлөгчөөсөө энэ шагналыг авсандаа маш их баярлаж байна. СТА болсноосоо хойш хорин жилийн дараа энэ шагналыг авч байна. Ерөнхийлөгч үлгэр жишээ сайхан яваарай гэж Ерөнхийлөгч надад захисан.