Дорнод аймгийн прокурорын газраас 2014 оныг Гэмт хэрэг, зөрчлөөс урьдчилан сэргийлэх жил болгон зарласантай холбогдуулан Хэрлэн сумын хэмжээнд гарч буй гэмт хэрэг, зөрчлийг бууруулах, хууль сахиулах байгууллагуудтай хамтран ажиллах, харилцан мэдээлэл солилцох, хамтын ажиллагааг бэхжүүлэх зорилгоор Хэрлэн сумын Засаг даргын Тамгын газрын хурлын зааланд сургалт зохион байгуулсан байна.

Сургалтанд ял эдлүүлэх ажиллагаанд тавих хяналт хариуцсан хяналтын прокурор Э.Идэрбат “Хэрлэн сумын хэмжээнд гарсан 2013 оны эрүүгийн хэргийн нөхцөл байдлын талаар мэдээлэл” мөн “Шүүхээс хорих ял нь хойшлогдсон, тэнсэн хянан харгалзагдсан ялтнуудад хэсгийн төлөөлөгч, багийн засаг дарга нараас тавих хяналт, хамтарч ажиллах анхаарах зарим асуудал”, Цагдаагийн газрын хүүхдийн байцаагч, цагдаагийн хошууч Д.Жавзандулам “Хүүхдийн гэмт хэргээс урьдчилан сэргийлэх нь”, Хүүхэд гэр бүлийн хөгжлийн хэлтсийн мэргэжилтэн Д.Цэрмаа “Хүүхэд гэр бүлийн хөгжлийг дэмжих нь”, Шүүхийн шийдвэр гүйцэтгэх албаны ахлах шийдвэр гүйцэтгэгч Д.Долгормаа “Иргэний хэргийн талаарх шүүхийн шийдвэр гүйцэтгэх ажиллагаа”  сэдвээр тус тус сургалт зохион байгуулж Хэрлэн сумын 10 багийн Засаг дарга нар болон нийгмийн ажилтнууд, багийн хэсгийн байцаагч  нийт 30 гаруй хүмүүс хамрагджээ.

Эдгээр сургалтуудыг зохион байгуулсанаар Шүүхээс хорих ял нь хойшлогдсон, тэнсэн хянан харгалзагдсан ялтнуудад хэсгийн төлөөлөгч, багийн засаг дарга нараас хэрхэн хяналт тавьж, хамтарч ажиллах талаар нэгдсэн ойлголтонд хүрч энэ талаар цаашид анхаарах зарим асуудлын талаар санал солилцож ажиллажээ.