Энэ жил шинэ үеийн хөгжлийн түүхэн 90 жилийн ойгоо тэмдэглэх төрийн байгууллагуудын тоонд статистикийн албаныхан багтаж байгаа. Монгол улсын анхны үндсэн хуулиа баталснаар бүртгэл статистикийн салбарт шинэ үеийн он тооллын хуудсаа нээжээ. Энэ оны туршид энэхүү тэгш ойд зориулсан олон ажлыг төлөвлөн хийж байгаа ажээ. Дэлхийн нийтээр НҮБ-ын түвшинд хэлэлцэн баталсан статистикийн үйл ажиллагааны 10 зарчмыг манай улс 1997 оноос бүгдийг хуульчлан баталж салбарын үйл ажиллагаандаа мөрдлөг болгон ажиллаж байна. Шинэжлэх ухааны үндэслэл, арга зүйн нэгдмэл байдал, мэдээллийн бодит байдал, аливаа нөлөөллөөс ангид байх, цаг хугацаандаа байх зэрэг эдгээр зарчмыг баримтлан ажиллаж буй байдалд дотоод, гадаадын хэрэглэгчид тэр тусмаа олон улсын мэргэжлийн байгууллагууд байнгын үнэлгээ, дүгнэлтээ хийдэг байна. НҮБ, түүний төрөлжсөн болон бүс нутгийн байгууллагын оролцоотойгоор өнгөрсөн оноос хэрэгжүүлж буй “Олон улсын цог үнэлгээ”-ний дүн энэ онд, түүхэн ойн жилд нэгтгэн гарах бөгөөд урьдчилсан байдлаар сайн үнэлэгдэж байгаа. Дашрамд дурьдахад, Статистикийн хорооны удирдлагын зарим ажилтан өөрчлөгдсөн нь статистикийн тодорхой мэдээллийг засах талаар улс төрийн зөрчлөөс үүдэлтэй гэх нь үндэслэлгүй гэнэ. Аливаа тоо мэдээллийн үзүүлэлт тооцох арга, мэдээлэл цуглуулах, боловсруулах, шинжилгээ хийх, нийтэд түгээх ажиллагаа статистикийн мэдээлэгч, хэрэглэгч олон нийтийн үргэлжийн хараанд ил тодоор дэлгээстэй байж гэмээнэ мэдээллийн үнэн зөв байдлаа хангах билээ.
