Хогны ногоон уутыг үйлдвэрлэхэд жилд нийслэлийн төсвөөс 3 тэрбум төгрөгийг зарцуулдаг. Тэгвэл энэ жил дээрх мөнгийг нэмж 4.5 тэрбум төгрөг болгосон юм. Үүнийг жиргээч залуус эсэргүүцэж “Үнэгүй тарааж буй хогны уутны мөнгөөр хүүхдийн эмнэлэг баръя” гэсэн санаачилга гаргасан билээ. Тодруулбал,  @UnurbayarG  тэргүүтэй жиргээчдийн санаачилга, шахалт, хүсэлтээр ногоон уутны асуудлыг НИТХ өнөөдөр авч хэлэлцэж байгаа юм.

Жиргээч залуусын хэлж буйгаар нэг айл өрх сард хогны уутанд зориулж 2600-3000 төгрөг өгдөг. Үүнээс 90 төгрөгийг хуримтлуулж хүүхдийн эмнэлэг барих бүрэн боломжтой гэж байгаа юм. Тус санаачилга  ч өнгөрсөн өдрүүдэд хүрээгээ тэлж олон хүний дэмжлэгийг аваад байгаа билээ.
 
Юутай ч  Төлөөлөлгчдийн ихэнх 4,5 тэрбум төгрөг үнэгүй тараахыг ард иргэд эсэргүүцэж байна гэсэн саналыг хотын даргад танилцууллаа. Энэ үеэр  хотын дарга Э.Бат-Үүл ногоон уутны тараалт үйлдвэрлэл явцын талаар мэдээлэл хийж, улмаар 4,5 тэрбум төгрөгөөр ногоон уут тараах эсэхийг ард түмнээс асуух хэрэгтэй юм байна гэсэн шийдэлд хүрчээ.

Дашрамд хэлэхэд, 24tsag.mn сайт 4,5 тэрбумын хогны уутыг үнэгүй тараах нь зөв үү гэж уншигчдынхаа дунд санал асуулга явуулахад 96 хувь нь эсэргүүцсэн юм.