Завхан аймгийн Прокурорын газраас 2014 оны 1 дүгээр улирлын төлөвлөгөөнд тусгагдсаны дагуу аймгийн прокурор Н.Доржсүрэн, Тосонцэнгэл сум дахь Сум дундын прокурорын газрын ахлах прокурор Х.Мөнхбаатар нар биечлэн явж тус аймгийн хойд болон зүүн бүсийн сумдууд болох Яруу, Идэр, Тосонцэнгэл, Их-Уул, Нөмрөг, Түдэвтэй, Баянхайрхан, Баянтэс, Асгат, Тэс, Тэлмэн зэрэг 11 сумдад хүрч ажилласан бөгөөд тус сумдын иргэд хөдөлмөрчид, сумдын төрийн болон төрийн бус байгууллага, аж ахуйн нэгжүүд албан хаагчид бүрэн бүрэлдэхүүнээрээ хамрагдаж нийт 900 гаруй иргэдэд прокурорын байгууллагын үйл ажиллагаа болон гэмт хэргээс урьдчилан сэргийлэх чиглэлээр мэдээлэл хийж, санал гомдол, хүсэлтийг нь хүлээн авч  ажилласан байна.

Ийнхүү ажиллахдаа Монгол улсын Прокурорын байгууллагын үйл ажиллагаа, бодлого чиглэл, Гэмт хэргээс урьдчилан сэргийлэх ажлын талаар болон Завхан аймгийн прокурорын газраас 2013 онд хийж гүйцэтгэсэн ажлын тайлан, 2013 оны аймгийн эрүүгийн нөхцөл байдлын талаар дэлгэрэнгүй мэдээлэл хийж, 1000 гаруй санамж, зөвлөмж, брошюр тараажээ.

Мөн сум орон нутгийн хэмжээнд Гэмт хэргээс урьдчилан сэргийлэх ажлыг хэрхэн зохион байгуулж байгаа байдалтай танилцаж, тодорхой төрлийн гэмт хэрэг зөрчлийг таслан зогсоох, урьдчилан сэргийлэх чиглэлээр хэрхэн ажил зохион байгуулсантай нь танилцаж, газар дээр нь заавар, зөвлөгөө, зөвлөмж өгч, иргэдийн санал хүсэлтийг сонссон байна.

Улсын Ерөнхий Прокурорын газраас 2014 оныг гэмт хэргээс урьдчилан сэргийлэх жил болгосонтой холбогдуулан олон төрөл, чиглэлийн ажил зохион байгуулах тухай мөн иргэд, байгууллага, хамт олныг гэмт хэргээс урьдчилан сэргийлэх ажлыг эрчимтэй зохион байгуулах талаар уриалан  ажилласан байна.