БШУЯ-аас “Мэргэжлийн чиглэл, индекс”-ийг шинэчлэн батлаад байна. Ингэснээр их дээд сургуулиудын мэргэжлийн чиглэл цөөрч байгаа бөгөөд энэ талаар ШУТИС-ийн ректор Б.Очирбаттай ярилцлаа.

-ШУТИС-ийн сургалтын хөтөлбөрт тодорхой хэмжээний өөрчлөлт орж байна. Энэ талаар танилцуулна уу?

-ШУТИС өнөөдөр БСШУ-ны Сайдын 2010 оны 235 тоот тушаалаар батлагдсан нийт 137 бакалаврын мэргэжлийн чиглэл, индекстэй сургалтын хөтөлбөрийг мөрдөж байна. Үүнээс Инженер, технологийн чиглэлийн хөтөлбөр – 106 /77,4%/, нийгмийн ухаан, менежмент, гадаад хэл, дизайны чиглэлийн хөтөлбөр – 31 /22.6%/ байна. БШУ-ны Сайдын тушаалаар 2014 онд шинэчилж баталсанхөтөлбөрийн индексийн дагуу инженер, технологийн чиглэлийн мэргэжлийн хөтөлбөрийн индексийн тоо 69 болж байна.

-Ямар үндэслэлээр мэргэжлийн хөтөлбөрүүдийн индекс шинэчлэгдсэн бэ?

-ШУТИС-ийн бакалаврын хөтөлбөрүүдийг олон улсын стандартад нийцүүлэн ангилж, индексүүдийг шинэчлэх санал, үндэслэлийг дараах хүчин зүйлүүдтэй холбон авч үзсэн.

 Үүнд:
•    Бакалаврын түвшний мэргэжлүүдийн тоо хэт олширч, сургалтын чанарт сөргөөр нөлөөлөх болсон, мөн зарим мэргэжлийн оюутны тоо цөөрсөн;
•    Мэргэжлийн давхардал ихсэж, мэргэжлийн нэр, ангилал, сургалтын агуулга олон улсын стандартаас зарим талаар хоцорсон;
•    Мэргэжил хэт нарийссанаас зарим мэргэжлээр төгсөгчдийн ажил эрхлэлт багасах хандлагатай болсон;
•    Сургалтын орчин, материаллаг баазын хүрэлцээ хангамж сул, зарим газруудад сургалт, судалгааны лабораторийн давхцал үүссэн, ашиглалт хангалтгүй.
•    Нэг багшид ноогдох оюутны тоо 19,5 байгаа нь сургалтын чанарт сөрөг нөлөөтэй болсон  /Олон улсын их сургуулиуд дунджаар 12-15 байдаг/.
•    Бүрэлдэхүүн сургуулиудийн удирдлага, мэргэжлийн хөтөлбөр хариуцаж буй профессоруудтай одоо мөрдөгдөж буй сургалтын хөтөлбөрийн талаар ажлын хэсэг уулзалт, ярилцлага хийн, хөтөлбөрүүдийг олон улсын ангилалд нийцүүлэн хэрхэн өөрчлөх талаар тэдний саналыг үндэслэн боловсруулсан нь чухал ач холбогдолтой.

-Мэргэжлийн чиглэл олон улсын ангилалын дагуу өөрчлөгдсөнөөр ямар давуу тал буй болж байгаа вэ ?

-Мэргэжлийн чиглэл индексийг хөтөлбөр болгож хамрах хүрээг өргөтгөснөөр хөтөлбөр нь уян хатан, бэлтгэн гарч буй инженерүүд хөрвөх чадвартай болно. Олон улсын боловсролын нэгдсэн ангилал, жишигт нийцсэн сургалтын хөтөлбөрөөр сургалтыг зохион байгуулснаар их сургуулийн олон улсад өрсөлдөх чадвар нэмэгдэнэ.Бакалаврын түвшний инженерийн боловсролыг ерөнхийлж, хэт олон давхардсан мэргэжил болон хичээлүүдийн тоог багасгана.Мэргэжлүүдээр багцын сургалт бодит утгаараа хэрэгжин, сургалтын чанар, санхүүгийн хувьд үр ашигтай болох боломж бүрдэж байна.Багш, оюутны тооны зохистой харьцаа бий болсноор багшийн оюутан бүрт хүрч ажиллах цаг хугацаа, боломж цаашид нэмэгдэнэ.Сургалтын арга технологид “Олон улсын инженерийн боловсролын шинэчлэлийн шинэ систем болох CDIO”-г нэвтрүүлэх ажлыг хэрэгжүүлнэ.