ҮХААЯ-наас өнөөдөр хаваржилтын нөхцөл байдлын талаар мэдээлэл хийлээ.

Энэ жил улсын хэмжээнд 19.4 сая хээлтэгч мал тоологдож үүнээс олон жилийн дунджаар 80.0 хувиар төл авна гэж үзвэл 15.5 сая төл хүлээн авах урьдчилсан тооцоо гараад байгаа билээ. Өнөөдрийн байдлаар манай улсад 5598.8 мянган эх мал төллөлснөөс 5585.3 мянган төл бойжиж байгаа бөгөөд төл бойжилт 99.8 хувьтай байна.

Гарсан төлийн хувьд 16.9 мянган ботго, 22.1 мянган унага, 94.2 мянган тугал, 2793.0 мянган хурга, 2658.9 мянган ишиг хүлээн авч, үүнээс 2124 хурга, 7752 ишиг, 4 ботго ихэрлэжээ.

Ингэснээс мал төллөлт өмнөх 7 хоногоос 2.0 орчим саяар нэмэгдэж, авбал зохих төлийн 36.0 хувийг хүлээн аваад байна.

Авсан төлийн тоо хэмжээг аймгуудаар  нь авч үзвэл Ховд 74.1 хувь, Баян-Өлгий 61.6 хувь. Дундговь 45.4 хувь, Увс 43.8 хувьтай бусад аймгууд 40.0 хүрэхгүй хувьтай байгаа юм.

Түүнчлэн нийт нутгийн 20 гаруй хувьд цастай байгаа нь өмнөх 7 хоногоос 10 хувиар буурчээ. Өөрөөр хэлбэл 2 аймгийн 11 сум буюу Завханы Тэсэд 21 см, Увсын Хяргас, Тургэн, Давст, Баруунтуруун, Тэс, Завханы Их-Уул, Яруу, Баянтэс, Тосонцэнгэл, Тэлмэнд 10-19 см, Увс нуур болон Дархадын хотгор, Завханы урд сумдын нутгаар 0-9 см цастай, бусад нутгаар цасгүй байна.

Салхины хурд Говь-Алтай, Баянхонгор, Өвөрхангай, Хэнтий, Дундговь, Дорноговь, Өмнөговийн ихэнх, Баян-Өлгий, Сүхбаатарын зарим сумдын нутгаар 16-25 м/с буюу аюултай үзэгдлийн хэмжээнд хүрч салхилсан ч хүчтэй салхи шуурганьг улмаас мал аж ахуйд хохирол бүртгэгдээгүй байна.