Нийслэлийн Сүхбаатар дүүргийн нутаг дэвсгэрийн автобусны буудлууд дээр ТҮЦ ажиллуулдаг иргэдтэй тус дүүргийн Засаг даргын орлогч Л.Амарзаяа өчигдөр уулзалт хийжээ.

Иргэдийн эрүүл, аюулгүй орчинд амьдрах нөхцөл боломжийг бүрдүүлэх, зам тээврийн осол гэмтлээс урьдчилан сэргийлэх ажлыг зохион байгуулах ажлын хэсгийн ээлжит хуралдаанаас гарсан шийдвэрийн дагуу зохих зөвшөөрөлгүй худалдаа үйлчилгээ явуулж байгаа болон хууль зөрчин ажиллаж байгаа, ТҮЦ-үүдэд үйл ажиллагаагаа энэ оны тавдугаар сарын 1-ний өдрийн дотор зогсоож, нийтийн эзэмшлийн зам талбайг чөлөөлөх тухай албан мэдэгдлийг хүргүүлсэн. Энэ дагуу дээрх уулзалтыг зохион байгуулсан бөгөөд ТҮЦ ажиллуулдаг иргэд мэдэгдлийг хүлээн зөвшөөрөхгүй байгаагаа илэрхийлж, тус бүрдээ шалтгаануудаа тайлбарлалаа.

Засаг даргын орлогч Л.Амарзаяа Нийслэлийн хэмжээнд ТҮЦ-ийн үйл ажиллагааг цэгцлэх журам хэлцэгдэж батлах тухай дуулгаад нийтийн эрх ашгийн төлөө, хотын цэвэр цэмцгэр, иргэдийн эрүүл аюулгүй байдлыг хангахын тулд зохих шаардлагуудаа тавьж ажиллана гэдгээ уулзалтын үеэр хэлжээ. Мөн дээрх хугацаанд багтаж өөрсдийн эд хөрөнгөө хурааж авах үүрэг өгсөн юм.