Дэлхийд алдартай CNN агентлаг манай улсын бэлгийн цөөнх буюу гей, лесби, трансжендер хүмүүсийн нууц амьдралыг харуулсан гэрэл зургуудыг нийтэлжээ.

Зургуудыг Испанийн фото зурагчин Алверо Лайз дарсан бөгөөд тэрээр энэ бүх зургийг авахын тулд гурван сар зарцуулсан байна.

Алверо Лайз энэ талаар “Би Монголоор аялахаар шийдсэн. Учир нь энэ орон Орос, Европ, Хятад гэсэн гурван ертөнцийн дунд оршдог ч өөрийн онцлогоо хадгалж үлдсэн юм. Энэ орон Барууныхны хөрөнгө оруулалтын ачаар нэлээд өөрчлөгдөж байгаа ч тэдний коммунист болон нүүдэлчин өв уламжлал нь мөн хадгалагдсаар байгаа юм. Энэ хоёрдмол байдал нь миний сонирхлыг татсан” гэжээ.

Улаанбаатарын трансжендер хүмүүсийн амьдрал хаалттай хаалганы цаана өрнөдөг. Тэд өөрсдийгөө чөлөөтэй илэрхийлэх боломжтой газрууд нь нууц клубүүд, хувийн үдэшлэгүүд байдаг. Тэдний нэгэнд уригдсан Лайз “үнэндээ тэд энэ хотын хамгийн сайхан үдэшлэгийг зохион байгуулдаг юм билээ” гэжээ. Зурган дээр мэргэжлийн бүжигчин Нурбул Улаанбаатарын нэгэн гэй үдэшлэг дээр үзүүлбэрт бэлдэж байна.

Тэдний цөөн хэсэг нь өөрийгөө илчлэхээс айдаггүй. Тэдний нэг Ганбууш, шөнийн клубын алдартай бүжигчин, Улаанбаатарын гудамжаар эмэгтэй хүний хувцастай алхаж чаддаг нэгэн. Тэр нэгэнтээ биеэ үнэлж байсан, одоо тайчих бүжиг заадаг буудалдаа хувийн нүүр будагчтайгаа үзүүлбэрт бэлдэж байгаа нь.

Ганбуушийн дотны найз Нараа, ихэнх залуу насаа Орост өнгөрөөснөөс архичин болсон. Одоо Монголд байгаа ч ажилгүй нэгэн. Тэр өргөмөл хүүтэй боловч тэжээж чадахгүйн улмаас төрсөн эгч нь нөхрийн хамт асарч хамгаалдаг гэжээ.

Баараа 55 настай, Улаанбаатарын ядуусын дүүрэгт амьдардаг. Тэр нэгэн олон нийтийн байгууллагад ажиллаж багахан цалин авдаг. “Улаанбаатар жижигхэн. Бүгд намайг мэдэх учраас надад ажил олддоггүй” гэлээ.

Нямка, 20 настай нийгмийн ажилтан залуу. Трансжендерүүдийн шинэ үеийн төлөөлөл болсон Нямкагийн мөрөөдөл Япон, Филиппин зэрэг харьцангуй чөлөөтэй орнууд руу цагаачилж хүйсээ солиулах.

Нямка, түүнд хүслээрээ өөрчлөгдөх боломж олгодог “Vanity” үдэшлэг дээр үзүүлбэр үзүүлсний дараа таксинд нүүрний будгаа арилган хувцсаа сольдог. Эмэгтэй хүний хувцас өмссөн эрэгтэй хүн хүчирхийлэлд өртөх нь Улаанбаатарт түгээмэл үзэгдэл.

Лайз Монгол хатдын хувцасны загварууд үзсний дараа хэсэг трансжендер хүмүүсийг Улаанбаатараас гадагш аваачиж уламжлалт гоёл зүүлттэй зураг авахаар шийджээ. Лайз “Би энэ зургийг үзсэн хүмүүс трансжендерүүдийг буруутгахаасаа өмнө тэднийг өөр өөрийн амьдралаар амьдрах гэж тэмцэж байгаа ердийн хүмүүс гэдгийг ойлгуулахыг зорьсон юм. Тэдэнд ямар ч буруу байхгүй” гэжээ.

24tsag.mn