Тархан суурьшсан Монголчууд ТББ-ын Тэргүүн, ТАСАМ олон улсын төслийн удирдагч, монгол судлаач, соёл судлаач Ц.Санчир "Монголын төлөөх зүрх бүхэн" сэдвээр цагдаагийн алба хаагч нарт лекц, ярилцлага зохион байгууллаа. Судлаач Ц.Санчир нь сүүлийн 10 гаруй жилийн хугацаанд Иран, Ирак, Афганистан, Туркменистан, Узбекистан, Казахстан зэрэг 40 гаруй улс орны 300 гаруй хот сууринд Монголын эзэнт гүрний түүх соёлын төдийлөн судлагдаагүй бүс нутаг, улс орнуудад хээрийн судалгаа зураг авалтаар ажиллаж ирсэн. Устах аюулд буй Монгол соёлын дурсгалууд, мөхөх аюулд буй Монгол угсаатнууд сэдвийн хүрээнд судлан сурвалжилж, баримтжуулсан телевизийн 15 баримтат цуврал болон хэвлэлийн 7 бүтээлүүдийг туурвиж олон нийтийн хүртээл болгосон байна.