Хөдөлмөрийн яамнаас ажил олгогчдын эрэлт хэрэгцээнд тулгуурлан “Үндэсний мэргэжилтэн ажилтан бэлтгэх хөтөлбөр”-ийг  хоёр дахь  жилдээ  хэрэгжүүлж байгаа. Энэхүү хөтөлбөрийн үр дүнд өнгөрсөн жил 6417 мэргэжилтэн бэлтгэгдэж тэдний 79 хувь ажлын байртай болсон байна. Энэ жилийн хувьд эхний ээлжний 5220 суралцагч танхимын сургалтаа дуусгаж, дадлагын хичээлдээ орж байгаа аж. Танхимын  сургалтын төгсөлт болон хоёрдугаар ээлжийн хичэээлийн нээлтийн арга хэмжээг  “Баялгийг бид бүтээнэ”  нэрийн дор зохион байгуулсан.  Мөн  Чингисийн талбайд  “flash mob” -д оролцон үзэл бодлоо бусдад түгээсэн юм. Харин өчигдөр Туул голын сав газарт цэвэрлэгээ хийлээ. Энэхүү цэвэрлэгээнд  14 сургуулийн 1000 оюутан хамрагдсан юм. Цэвэрлэгээний үеэр БОНХ-ийн сайд С. Оюун ирсэн юм.
 Тэрбээр “Цэвэрлэгээний ажлыг албан шаардлагаар биш сайн дураар хийх ёстой. Мөн хогоо хаяхгүй байх хэрэгтэй юм. Туул голын дагуу маш их хог хаядаг. Өнгөрсөн жил Туул голын дагуу 50 метр онцгой бүсийн тэмдэгжилтийг хийсэн байгаа. Мөн Туул голын сав газрын захиргаа гэж байгууллагдсан. Хөдөлмөрийн яам МСҮТ-үүдтэй хамтраад маш зөв ажлыг санаачилж хийж байна. Одоо цэвэрлэгээ хийж байгаа залуучууд хогоо гудамж талбайд хаяхгүй байх. Манай яам, Хөдөлмөрийн яамтай хамтраад цэвэрлэгээний ажлыг эхлүүлж байгаа. Цаашлаад бусад яам болон төрийн байгууллагатай хамтран нэг сарын аяныг зохион байгуулна” гэдгээ хэлсэн юм.
Харин МСҮТ-ийн оюутнууд цэвэрлэгээ маш идэвхитэй оролцож, өөрсдийн хариуцаж авсан газрынхаа хог хаягдлыг  хурдан шуурхай цэвэрлэж байв. Цэвэрлэгээнд хамрагдсан оюутнууд өөрсдийнхөө суралцаж байгаа мэргэжлийн хувцасаар жигдэрсэн байсан юм. Мөн “Үндэсний мэргэжилтэн бэлтгэх хөдөлмөр” хамрагдснаар ажлын байраар бүрэн хангагдах боломжтой учраас бусад их, дээд сургуулиас давуу талтай гэдгээ хэлж байв. Түүнчлэн, энэ хөтөлбөрт хамрагдснаар өөрсдийн хүссэн мэргэжил ажилдаа орж байгаа гэдгийг онцоллоо.
Цэвэрлэгээнд хөгжлийн бэрхшээлтэй иргэдийн төлөөлөлч гэсэн оролцож байв. Энэ үеэр Хөгжлийн бэрхшээлтэй иргэд албан бус боловсрол олгох төвийн тэргүүн Н.Энхбаяр хэлэхдээ “Манайх хөгжлийн бэрхшээлтэй  иргэд рүү чиглэсэн үйл ажиллагаа явуулдаг. Хөдөлмөрийн биржтэй хамтарч  зургаан чиглэлийн сургалт явуулдаг. Энэхүү сургалтандаа өөрийн зорилтот бүлэгт хамрагдсан иргэдийг хамруулж байгаа. Хөгжлийн бэрхшээлтэй иргэд ажлын байраар хангагдах боломж бага байдаг.  Тиймээс бид хөгжлийн бэрхшээлтэй хүмүүс ямар чиглэлээр сургалт явуулбал ажлын байр болох вэ гэдгийг судлаж үзсэн. Үүний үндсэн дээр оёдол эсгүүр, талх нарийн боов,  комьютерийн хэрэглээ гэсэн чиглэлээр сургалт явуулж байгаа. “Үндэсний мэргэжилтэй ажилтан бэлтгэх хөтөлбөр”-т манайхаас 64 оюутан суралцаж байгаа. Үүнээс 54 иргэн хөгжлийн бэрхшээлтэй. Энэ долоо хоногт суралцаж төгсөөд ажлын байрандаа дадлагаа хийнэ. Оёдол эсгүүр чиглэлээр нэлээд олон иргэд суралцаж байгаа. Эдгээр хүмүүс өөрсдөө бүлэг болоод үндэсний болон европ хувцасны чиглэлээр үйлдвэрлэл эрхлэж байгаа” гэдгийг онцолсон юм. Оюутнууд  Баянзүрхийн гүүрнээс Яармагийн гүүр хүртэл нийтдээ 16 км газрын хог хаягдлыг цэвэрлэлээ. Улмаар цэвэрлэсэн хог хаягдлыг шуудайлж Баянзүрх,  Хан-Уул дүүргийн ТҮК-ийн машинд ачуулсан юм.
 “Үндэсний мэргэжилтэй ажилтан бэлтгэх хөтөлбөр”-ийн нэгдүгээр ээлжинд хотын 31 МСҮТ-д 1662 суралцагч, хөдөөд 26 МСҮТ-д 3558 суралцагч 948 ажил олгогчийн 7772 ажлын байрны захиалгаас сонгон суралцаж байгаа юм.  Харин “Үндэсний мэргэжилтэй ажилтан бэлтгэх хөтөлбөр”-ийн хоёрдугаар ээлжийн бүртгэл явагдаж, 2919 иргэн бүртгүүлсэнээс 1728 иргэн ажил олгогчтой гэрээ байгуулан хичээлдээ ороход бэлэн болсон байгаа аж. Иргэдээ ажилтай, орлоготой болгох, нөгөө талаас ирээдүйд хийгдэх үндэсний бүтээн байгуулалтад оролцох дотоодын ажиллах хүчийг бодлоготойгоор бэлтгэх, хөдөлмөрийн зах зээлд мэргэжилтэй, чадвартай ажилтан нийлүүлэх бодлогод томоохон түлхэц болж буй энэ хөтөлбөрт Засгийн газар онцгойлон анхаарал хандуулж байгаа юм байна. Мөн Хөдөлмөрийн яам “Үндэсний мэргэжилтэй ажилтан бэлтгэх хөтөлбөр”-ийг цаашид хэрэгжүүлж, улам олон ажил хайгч иргэдийг ажилтай орлоготой болгож, Монгол хүн өөрөө эх орныхоо бүтээн байгуулалтыг түүчээлэх учиртай хэмээн үзэж байгаа аж. Иймээс энэ онд бүтээн байгуулалтын их ажлууд хийгдэж, зарим аймгийг Улаанбаатар хоттой авто замаар холбохын зэрэгцээ орон сууцжуулах хөтөлбөр хэрэгжинэ. Түүнийгээ дагаад сайн арматур зангидагч, өрлөгчин, авто зам барих мэргэжилтэн чухал байгаа. Тиймээс Хөдөлмөрийн яамны харьяа Хөдөлмөрийн төв биржид хандан бүртгүүлж “Үндэсний мэргэжилтэй ажилтан бэлтгэх хөтөлбөр”-т хамрагдаж “цалинтай” суралцан мэргэжилтэй болж, ажилтай болох алтан боломж иргэн бүрт  байгаа гэдгийн албаны хүмүүс онцолсон юм.
Юутай ч бид энэ удаад нийгэмрүүгээ чиглэсэн, иргэдэд бага ч гэсэн урам зоригийг бэлгэлэх үүднээс дээрх сурвалжлагыг бэлтгэлээ.