“Шүүх эрх, мэдлийн шинэтгэлийг гүнзгийрүүлэх, хөтөлбөр”-ийн хүрээнд зохион байгуулж байгаа “Төв, орон нутгийн хуулийн байгууллагуудын нэгдсэн зөвлөгөөн” Дархан-Уул аймагт амжилттай явагдаж байна.

Монгол Улсын Ерөнхийлөгчийн санаачлан  боловсруулсан “Шүүх эрх, мэдлийн шинэтгэлийг гүнзгийрүүлэх, хөтөлбөр”-ийн хүрээнд  Улсын Ерөнхий прокурорын санаачлагаар зохион байгуулж байгаа “Төв, орон нутгийн хуулийн байгууллагуудын нэгдсэн  зөвлөгөөн” Дархан-Уул аймгийн удирдлагуудтай уулзсанаар амжилттай эхэлжээ.

Тус зөвлөгөөнд Аймгийн прокурор Г.Бат-Очир, Сум дундын 7 дугаар шүүхийн Ерөнхий шүүгчийн үүргийг түр орлон гүйцэтгэгч Б.Манлайбаатар, Давж заалдах шатны 9 дүгээр шүүхийн ерөнхий шүүгч Б.Батзориг, Цагдаагийн газрын дарга, цагдаагийн хурандаа Ц.Намсрайжав, Шүүхийн шийдвэр гүйцэтгэх албаны дарга, дэд хурандаа С.Зул-Очир нар өөрсдийн байгууллагын 2013 онд хийж гүйцэтгэсэн ажил, хуулийн байгууллагуудын хамтын ажиллагаа, ололт, дутагдал, хүндрэл бэрхшээлтэй асуудлууд, цаашид хэрэгжүүлэх арга хэмжээний талаар  мэдээлэл хийж санал солилцсон байна.

Мөн зөвлөгөөнийг зохион байгуулж буй ажлын хэсгийн ахлагч Улсын  Ерөнхий Прокурорын туслах, Гүйцэтгэх ажилд хяналт тавих хэлтсийн дарга О.Чулуунбаатар, УЕП-ын газрын Мөрдөн шалгах ажиллагаанд хяналт тавих хэлтсийн хяналтын прокурор Д.Мөнгөнцэцэг, Хууль зүйн яамны Эрх зүйн шинэтгэлийн бодлогын газрын дарга Т.Бат-Өлзий, Шүүхийн Ерөнхий Зөвлөлийн Шүүхийн зохион байгуулалтын хэлтсийн ахлах референт Д.Одхүү, Цагдаагийн Ерөнхий газрын Олон нийтийн аюулгүй байдлыг хангах газрын Мэргэжил арга зүйн хэлтсийн дарга хошууч Ү.Наранбаатар, Шүүхийн Шийдвэр Гүйцэтгэх Ерөнхий газрын Хуулийн хэлтсийн дарга ахмад Д.Амгалан нар “Шүүхийн шинэтгэлийг гүнзгийрүүлэх хөтөлбөр”-ийн хүрээнд хуулийн  байгууллагуудын хэмжээнд явуулж буй  өөрчлөлт шинэчлэлт, цаашдын зорилтын талаар дэлгэрэнгүй сургалт, ярилцлага  явуулж байгаа ажээ.