Шүүхийн шинэчлэлийн дөрвөн багц хууль энэ хаврын чуулганаар хэлэлцэгдэх учиртай. Тэгвэл энэ асуудлаар Монголын өмгөөлөгчдийн холбооны зарим гишүүд өнөөдөр байр сууриа илэрхийллээ. 

Энэ үеэр тэд дээрх хуулиуд нь өнөөгийн нийгэмд зайлшгүй хийгдэх ёстой өөрчлөлт шинэчлэлийг авчирч чадна гэж үзэж буйгаа илэрхийлээд, тэр дундаа гэмт хэргийн тухай хууль нь хүний эрх, эрх чөлөөг дээдлэх, шоронжсон байдлыг халахад эерэг нөлөө үзүүлэхээр хууль болсон гэв.

Учир нь одоо мөрдөгдөж байгаа эрүүгийн хуулиар аливаа хэрэг шийдэгдэхдээ мөрдөн байцаагч зөвхөн байцаалт, мэдүүлгээр нотлох баримт хийж прокурорт шилжүүлдэг. Түүнд прокурор яллах дүгнэлт үйлдсэнээр шүүхэд шилжиж байгаа бөгөөд энэ шат дамжлагад өмгөөлөгч хэргийг шийдэхэд нотлох баримт дэлгэх боломжгүй, дэлгэлээ ч хүлээн авдаггүй байна. Үүнийг шинээр батлагдах гэж буй гэмт хэргийн тухай хуульд тусгаж өгснөөрөө хэргийг үнэн зөвөөр шийдвэрлэхэд тус дэм болно гэдгийг тэд хэллээ.

Түүнчлэн гэмт хэрэгт холбогдон ял шийтгүүлсэн хүнийг дахин гэмт хэрэг хийвэл хэргийг хүндрүүлж үздэгийг шинэ хуулиар халах аж.

Энэ талаар тэдний нэг өмгөөлөгч Б.Баярсайхан “Одоогийн эрүүгийн хуулийг хэт шоронжсон, хүний эрхийг хясан боомилсон, ял завших болон хэлмэгдэх боломжуудыг олгодог гэж олон жил шүүмжилсэн. Үүнийг засах гэж оролдсоноороо гэмт хэргийн тухай хууль давуу юм. Гэтэл зарим нэг этгээдүүд эрх мэдэл албан тушаалын төлөө хувийн амбицаар энэ хуулийг эсэргүүцэж байна. Шинэ юм заавал төгс байх албагүй. Үүнийг нэмэлт өөрчлөлтүүдээр засч янзлаад нийгэмтэйгээ нийцүүлээд явах боломжтой” гэсэн юм.