Чингэлтэй дүүргийн Засаг даргын Тамгын газраас Хөдөлмөрийн хэлтэс, Адра Монгол олон улсын байгууллагатай хамтран “Газар тариалан эрхлэгчдийн зөвлөгөөн”-ийг зохион байгууллаа.Зөвлөгөөнөөр хүнсний ногоо тариалах, өрхийн үйлдвэрлэл эрхлэхэд дэмжлэг үзүүлэх Засгийн газрын бодлогын талаар, Нийслэлийн хэмжээнд газар тариалан эрхлэгчдийн өнөөгийн байдал, цаашдын зорилт, хөдөлмөр эрхлэлтийг дэмжих, олон улсын байгууллагуудтай хэрхэн хамтарч ажиллаж байгаа талаар болон өрхийн аж ахуйн туршлага судлах аялал зэргийг зохион байгуулсан.
Монгол Улсын Засгийн газраас өрх, жижиг аж ахуй, фермер эрхлэгчдийг дэмжих зорилгоор 2005-2012 онд “Ногоон хувьсал” хөтөлбөр, газар тариалан эрхлэгчдийг дэмжих үүднээс 2008 оны “Хүнсний хангамж, аюулгүй байдлын жил” болгон зарлаж мах, сүү, гурил, төмс, гол нэрийн хүнсний ногооны хэрэгцээгээ дотоодын үйлдвэрлэлээр бүрэн хангадаг болох зорилтыг дэвшүүлж, “Атрын гурав дахь аян”-ыг тус тус зохион байгуулсан. Хөтөлбөрийг хэрэгжүүлсэнээр газар тариалангийн салбарт эрх зүй, эдийн засаг, техник, технологийн иж бүрэн шинэчлэл хийгдэж хүн амыг дотооддоо үйлдвэрлэсэн аюулгүй хүнсний бүтээгдэхүүнээр бүрэн хангах, улмаар дэвшилтэт техник, технологи нэвтрүүлэх, тариаланчид, механикжуулагчид, ногоочдын залуу халааг бэлтгэх, ажилгүйдэл, ядуурлыг бууруулахад бодитой үр дүн болсон юм. Мөн Монгол улсын Засгийн газраас 2012-2016 оны үйл ажиллагааны хөтөлбөрт хүнсний ногоо тариаланчдыг дэмжих зорилгоор аймаг, нийслэл, дүүрэгт төмс хүнсний ногоо худалдан борлуулах сүлжээг байгуулах ажлын хүрээнд дүүргийн 5 цэгт байгуулсан. Үүнд 8 аймгийн 86 ногоочин 540тн хүнсний ногооны борлуулалт хийсэн.
Сүүлийн жилүүдэд ажилгүйдлийг бууруулах, ажлыг бүлгээр эрхлэхийг дэмжих замаар Монгол Улсын Засгийн газраас “Эзэнтэй Монгол” хөтөлбөр, “40 дээш насны иргэдийн хөдөлмөр эрхлэлт”-ийг дэмжих дэмжих хөтөлбөрүүд хэрэгжиж байна. Үүний хүрээнд 2012-2013 онуудад Сонгино хайрхан дүүргийн Ил тарвагатайн аманд 10 га газарт 10 бүлгийн 200 иргэнийг, 2014 онд шинээр 10 га газарт 5 бүлгийн 100 иргэдийг хөтөлбөрт хамруулахаар ажиллаж байна. Энэхүү хөтөлбөрт хамрагдсан иргэд Нийслэлийн Хөдөлмөрийн газраас тоног төхөөрөмж, усалгаажуулалтын асуудал, мэргэжил арга зүйн зөвлөгөө өгөх зэрэг асуудлуудыг бүрэн шийдвэрлэж, дүүргийн Засаг даргын Тамгын газраас 5 ханатай 2 гэрийг үнэгүй олгосон.
Мөн Адра Олон Улсын байгууллага нь “Өрхийн тогтвортой тариалан” төслийг хэрэгжүүлж гэр бүлийнхээ хүнсний хангамжийг сайжруулах, өрхийн орлогоо нэмэгдүүлж амьжиргаагаа дээшлүүлэх зорилго бүхий дүүргийн 4 хорооны 55 өрх буюу 220 өрхийг хамруулж байна.
Цаашид жижиг дунд үйлдвэрийг дэмжих зээл, хувиараа хөдөлмөр эрхлэгчдийг дэмжих зээлэнд хоршоо хөтөлбөрийн хүрээнд хорших замаар газар тариалан эрхлэгчдийг хамруулах боломжтой гэсэн дүгнэлтэнд зөвлөгөөн зохион байгуулагчид хүрсэн юм.
