Нийслэлийн төсвөөс жилд 4,7 тэрбум төгрөгийг зарцуулахаар байгаа хогны ногоон уутыг цаашид тараах үгүйг иргэдийн дунд санал асуулга явуулж шийдэхээр болсон билээ. Тэгвэл өнөөдөр энэхүү санал асуулгыг хэрхэн зохион байгуулах талаар НЗДТГ-аас мэдээлэл хийлээ.

Санал асуулгыг энэ сарын 19-ны бямба гарагт явуулах бөгөөд нийслэлийн 9 дүүргийн  152 хорооны 33 мянган өрхийг хамруулахаар болжээ. Ингэхдээ МОХ-ны дэргэдэх “Сор гоо” клубын 152 судлаач 2 хоногт багтаан айлуудаас саналыг цаасаар авах юм.

НЗДТГ-ын Хяналт шинжилгээ, үнэлгээний хэлтсийн дарга Х.Гантулга энэ талаар "Тухайн хорооны айл өрхийн тооноос хамаарч 2-4 судлаач явж энэ асуулгыг авна. Ер нь бид хөндлөнгийн байдлаар судлаачдын багаа бүрдүүлж байгаа. Энэ дөрвөн сарын 21-ны өдөр судалгааны эцсийн үр дүнг гаргана. Түүнийгээ бид энэ сарын 24-нд болох Нийслэлийн Удирдлагын зөвлөлийн хуралдаанаар оруулж хэлэлцүүлнэ" гэсэн юм.

Дашрамд сонирхуулахад энэхүү санал асуулгыг явуулахад нийслэлийн төсвөөс 30 гаруй сая төгрөгийг зарцуулж байгаа аж.