Манай улсад амьжиргааны өртөг өсөн нэмэгдсээр байгаа ч иргэд түүндээ хүрэлцэхүйц цалин хөлс авч чадахгүй байгаа.

Тэгвэл үүний тод жишээ болсон соёл урлагийн ажилчид өнөөдөр салбарын яамныхаа гадна талбайд жагсаж өөрсдийн дуу хоолойг хүргэлээ.

Өнөөдөр соёл урлагийн ажилтнууд сард дундажаар 400 гаруй мянган төгрөгийн цалин хөлс авдаг. Гэтэл энэ мөнгө цаашид өсөн дэвжих битгий хэл хоногийн хоолонд ч хүрэхгүй байгааг тэд хэлж байна.

Хамгийн гол нь ССАЖЯ тэдний цалин хөлсийг нэмэгдүүлэх, ажиллах нөхцлийг  сайжруулахад анхаарахгүй байгаа нь өнөөдрийн жагсаалыг хийх гол нөхцөл болсон гэв.

Энэ үеэр ССАЖЯ-ны дэд сайд М.Түмэнжаргал тэдний цалин нэмэгдүүлэх шаардлагыг хүлээн авсан бөгөөд тэрээр “Цалин нэм гэсэн дариуд нэмэх боломж байхгүй. Бид тодорхой хугацаанд судалж үзэж байж энэ асуудлыг шийдэх болно. Судалгааг хэдийнэ эхэлсэн” гэсэн тайлбарыг өглөө.

Жагсаалд театр, музей, номын сан зэрэг урлаг соёлын бүхий л салбарынхан оролцсон бөгөөд энэхүү жагсаал орон нутагт нэгэн зэрэг зохион байгуулагдсан гэнэ.

Ингээд жагсаалд оролцогчдын байр суурийг хүргье.

МУГЖ С.Тунгалаг: Энэ салбарын авьяастнууд мэргэжлээсээ ухарвал яах вэ?

-Манай уран бүтээлчид ингэж хөдөлж байсан удаа байхгүй. Ингэж өргөн хүрээтэй хөдөлж байна гэдэг нь эцэстээ тулж байна гэсэн үг. Урлагийнхныг мэргэжилдээ их дуртай юм яахав гэж ярьдаг. Тэр нь үнэн. Эмч, багш нар ч мэргэжилдээ сонирхолтой хайртай байдаг. Гэтэл ард нь амьдрал гэж нэг юм байна. Ер нь өнгөрсөн нийгмээсээ эхлээд хамгийн бага цалинтай салбар бол яах аргагүй соёл урлагийн салбар. Нэмэгдээд байгаа хэрнээ л хамгийн бага цалинг авч байна. Энэ жил төгсөөд мэргэжлийн уран бүтээлч болоод ирж байгаа хүүхдүүд хэдэн төгрөгний цалин авч байна? Төсвийн байгууллагын ажилтны доод хэмжээний цалин хөлсийг авч байна. Тэгээд тэр хүн чин залуу хүн учраас цаашид сурч боловсрох, үр хүүхдүүдээ тэжээхээс авахуулаад өчнөөн юм байгаа биз дээ. Тэд хичнээн сайхан авьяастай ч гэсэн авьяаснаасаа ухрах хэмжээнд хүрчихээд байна. Монголын ард түмний зүрх сэтгэл хийморь сүлдийг авч явдаг энэ салбарын авьяастнууд мэргэжлээсээ ухарвал яах вэ? Ийм хүнд байдал хүрээд энэ цуглааныг хийж байна.

УДЭТ-ын гэрлийн найруулагч Ц.Эрдэнэбат: Хөдөлмөрлөх нөхцөл алга

-УДЭТ ноднин гэрлийн инженер авахад арваад хүн ирсэн. Цалингаа голоод буцаад явчих юм. Сургуулийг нь төгсчихөөд ийм цалингаар ажиллахгүй гээд явчихаж байна. Тэгэхээр урлагийн ажилтны цалин ямар хэмжээнд оччихоод байгаа нь харагдаж байна шүү дээ. Хоёрдугаарт цалин хөлснөөс гадна нэг зүйлийг хэлмээр байна. Манайд урлаг хөгжиж байна гээд сайхан сайхан юм яриад байна. Гэтэл урлагийн салбараа яаж харж үзэж байгааг хар л даа. ҮДБЭЧ, УДЭТ, Хүүхэлдэйн теарт гээд гурван байгууллага байрлаж байгаа энэ барилга соёлын ордны л хэмжээтэй барилга шүү дээ. Соёлын ордны хэмжээний барилга дээр л урлагийг хөгжүүлж байна. Энд сэтгэлтэй хүмүүс л ажиллаж байна. Дээр нь одоо хэрэглэж байгаа тоног төхөөрөмж нь 1960-аад оны техникүүд байна. Тэгсэн мөртлөө орчин үеийн урлагийг хөгжүүлнэ гэж яриад байдаг. Тэрийг солих санал зөндөө гарсан. Гэтэл яам үүнд ерөөсөө анхаарахгүй байна. Театр бол нийлмэл урлаг. Жүжигчин найруулагч арын албаныхан нийлж байж бүтдэг. Гэтэл арын албаны боловсон хүчнийг бэлдэх ажлыг яам огт хийхээ больсон. Ерөөсөө л соёл урлагийг хаясан гэж хэлэхэд болно. Хөдөлмөрлөх нөхцөл алга.