Иргэний хөдөлгөөнүүдийн нэгдсэн холбоо Улаанбаатар дахь Кубын элчин сайдын яамтай хамтран зургаадугаар сарын 14-нд Эрнесто Че Геварагийн төрсөн өдрийн зохион байгуулахаар болсон байна.

Энэ талаарх мэдээллийг Иргэний хөдөлгөөний тэргүүн, ШӨХТГ-ын дарга О.Магнай олон нийтэд зарлав.  Тэгвэл ирэх сонгуульд нэрээ дэвшүүлэх гэж буй О.Магнайгийн сонгуулийн ажил хувьсгалыг өдөөн турхиснаар, хувьсгал хийх санаагаа “далд” утгаар илэрхийлсэнээр эхлэв үү гэж олон хүн гайхаж байна.
Учир нь Эрнесто Че Гевара бол Ардчилсан улсад үзэл санаа нь тийм ч нийцэхээргүй хүн гэдгийг хэн хүнгүй л мэдэх биз ээ. Тиймээс ч Барууны орнуудад энэ хүнийг нэг их таашаадаггүй.
Тэгвэл энэ бүхнээс үүдэж  О.Магнай нарыг Кубын элчин сайдтай хамтарч хувьсгалч Эрнест Че Геварагийн төрсөн өдрийг тэмдэглэж байгаа нь цаанаа өөр зүйл агуулж байж болох юм гэсэн хардлага нийгэмд бий болоод байгаа юм.

Домогт хувьсгалч Эрнест Че Гевараг шүтэгчид өдрөөс өдөрт олширч байгаа нь үнэн ч АН-ын тодотголтой хүн түүний төрсөн өдрийгнь  хүртэл тэмдэглээд явна гэдэг байж болох зүйл мөн үү гэх хүмүүс ч байна.

Юутай ч гадаадын хөрөнгө оруулагчдыг хөөж, олон арван хүн амиа алдахад хүргэсэн  зэрэг  шүүмжлэлд өртөж байсан түүний төрсөн өдөрт ийн хөл алдан гүйж байгаа Иргэний хөдөлгөөнийхөнд иргэд ам муутай байна.

Магадгүй энэ нь хувьсгал сайнаасаа илүү сөрөг үр дагаваруудыг ихээр авчирдаг гэх иргэдийн үзэл бодлоос улбаатай байж мэдэх юм.

Ийн Иргэний хөдөлгөөнүүд Эрнесто Че Геварагийн төрсөн өдрийг тэмдэглэх гэж байгаа нь хувьсгалыг уриалж байна гэсэн хардлагыг бий болгоод байгаа юм.