ДЭМБ-ын Номхон Далайн Баруун Бүс 2014 оны “Дархлаажуулалтын долоо хоног”-ийг энэ сарын 21-27-ны өдөр “В гепатитын эсрэг вакцины төрөх тунгийн хамралтыг нэмэгдүүлэх замаар В гепатитын халдвар, элэгний хавдраас сэргийлье” уриан дор тэмдэглэн өнгөрүүлж байна. Вакцинд хамруулах өдөр өнөөдөр дуусч байгаа аж.

Дархлаажуулалт эхлэхээс өмнө манай орны хүн амын 80 хувь нь В вируст гепатитын халдвар авсан, насанд хүрэгчдийн 15-20 хувь, бага насны хүүхдийн 5-11хувь нь В вирусын архаг тээгч байгааг судлаачид тогтоосон. НДББ-ийн хөгжиж буй орнуудаас манай улс анх удаа В гепатитын вакциныг туршиж, үндэсний хөтөлбөрт нэвтрүүлсэн ба 2010 онд хийсэн үндэсний хэмжээний ийлдэс-судалгаагаар 0-5 насны хүүхдүүдийн дунд элэгний В вирус тээгчийн тархалт 0.53 хувьд хүрч, ДЭМБ-ын НДББ-ээс дэвшүүлсэн “Дархлаажуулалтад хамрагдсан тав хүртэлх насны хүүхдийн дунд тохиолдох элэгний В вирусыг тээгчийн тархалтыг хоёр хувиас бууруулах зорилтыг хангасан байна.

В гепатитын халдвар нь элгэнд өөрчлөлт өгч, илрэх хүртэлээ удаан хугацаагаар шинж тэмдэггүй байж хүндэрдэг учраас “чимээгүй тахал” гэж нэрлэгддэг. Халдвартай хүмүүсийн ихэнх нь халдвар авсан эсэхээ мэддэггүй ба халдвартай эхээс хүүхэд төрөх явцдаа уг халдварыг авах эрсдэл өндөр бөгөөд төрөх явцдаа халдвар авсан нярайн 90 орчим хувьд нь халдвар архагшиж,  элэгний хатуурал, хавдрын гол шалтгаан болдог.

Манай улс элэгний хавдрын өвчлөл, нас баралтын түвшин өндөртэй орнуудын нэг бөгөөд 2012 онд шинээр бүртгэгдсэн хорт хавдрын дотор элэгний хорт хавдрын өвчлөл 38 хувийг эзэлж, 1619 тохиолдол буюу 10000 хүн тутмаас зургаа нь нас баржээ. Зарим судлаачдын судалгааны дүнгээс харахад, элэгний хавдартай өвчтөний 40-60 орчим нь гепатитын В вирусын халдвар авчээ.  

Иймд, В гепатитын халдвар дамжихаас урьдчилан сэргийлэх хамгийн сайн арга бол шинэ төрсөн нярай бүрийг В гепатитын эсрэг вакцинаар төрсний дараа 24 цагийн дотор дархлаажуулах явдал юм.

2013 оны байдлаар улсын хэмжээнд В вируст гепатитын вакцины хамралт 99.1 хувь, үүнээс 24 цагийн хамралт нь  96.9 хувьтай байна. Дэлхий  дахин энэ вакциныг хавдрын эсрэг анхны вакцин гэж хүлээн зөвшөөрсөн байдаг.

Дашрамд дуулгахад, 2003 онд ДЭМБ-ын Америкийн бүсээс Дархлаажуулалтын долоо хоногийг санаачлан тэмдэглэж, 2012 онд анх удаа ДЭМБ-ын зургаан бүсийн 180 гаруй улс оронд  нэгэн зэрэг тэмдэглэн өнгөрүүлжээ.