Монголын Генералуудын өдөр өнөөдөр тохиож  байна. Энэ өдөр генерал цол бий болсны 70 жилийн ой мөн тохиож байгаа аж. Зэвсэгт хүчний дээд цолыг өнгөрсөн 70 жилийн хугацаанд нийт 160 хүнд хүртээсэн байдгаас өдгөө 82 генерал амьд сэрүүн байна. Тэд өнөөдөр төв талбайдаа цуглаж эзэн Чингэс хааны хөшөөнд хүндэтгэл үзүүлж, Сүхбаатарын хөшөөнд цэцэг өргөлөө. Харин Генералуудын өдрийн онцгой зочин ЦЕГ-ын дарга асан хошууч генерал Ч.Амарболд байлаа. 2008 оны долдугаар сарын 01-ний өдөр нийтийн эмх замбараагүй байдлыг таслан зогсооход хариуцлага алдсан гэдэг үндэслэлээр хорих ялаар шийтгүүлж, улмаар магадлангаар суллагдаад байгаа тэрээр өнгөлөг жавхаалаг харагдаж байсныг хүмүүс онцолж байв. Түүний сэтгэгдлийг сонсоход "Генералуудтайгаа мөр зэрэгцээд алхах, үнэхээр сайхан байна. Миний биеийн байдал сайн байгаа, гэрээр эмчилгээгээ хийлгээд явж байгаа" гэв.

Мөн тэрбээр энэ үеэр долоон сарын 1-ний үйл явдлын талаар ярихгүй гэж байгаа ч цаашдаа энэ талаар ам нээнэ гэдгээ ч хэлж байв.