Монголын Генералуудын өдөр өнөөдөр тохиож  байна. Энэ өдөр генерал цол бий болсны 70 жилийн ой мөн тохиож байгаа аж. Тиймээс генералууд маань өнөөдөр баяраа тэмдэглэж байгаа билээ. Энэхүү үйл ажиллагааны эхлэл болгож өнөөдөр генералууд Чингисийн талбайд хүндэтгэл үзүүллээ. Юутай ч Монгол Улс өдгөө 84 генералтай. Тэдний дөрөв нь аавын хаалга татчихсан гашуун түүхтэй. Тэгвэл хүндэтгэлийн арга хэмжээний үеэр генерал Д.Сандаг-Очир, генерал Ч.Амарболд нартай цөөн хором ярилцлаа.

Д.Сандаг-Очир: ЦЕГ-аар даргаар ажиллаж байхад бүгд санаа, зорилго нэгтэй сайхан байсан

-Өнөөдөр генерал цол бий болсоны 70 жил тохиож байна. Сэтгэгдлээсээ хуваалцахгүй юу?
Өнөөдөр их сэтгэгдэл их сайхан өндөр байна. Завхан аймгийн засаг дарга нутгийн генералуудаа хүлээж авсан. Миний оршин суугаа Сүхбаатар дүүргийн Засаг даргын тамгын газрынхан мөн хүлээж авлаа. Өнөөдрийн нэгдсэн арга хэмжээг Батлан хамгаалах яам зохион байгуулж байна. Өнөөдрийн баяр цааш үргэлжилнэ. Нэлээн хэдэн арга хэмжээнд оролцоно.

-Таны хувьд багагүй хугацаанд ЦЕГ-ын дарга албыг хашиж байсан. Энэ үед цаг үе ямар байв?
-Би 1991-1996 он хүртэл ЦЕГ-ын дарга, Дотоодын цэргийн коммандлагчаар ажилласан. Дараа нь хоёр жил УИХ-ын газар ажилласан. 2008-2012 он хүртэл дахин Цагдаагийн ерөнхий газрын даргаар ажилласан. Ажиллах хугацаанд сэтгэгдэл их өндөр байсан. Бие бүрэлдэхүүн, даргалах бүрэлдэхүүн бүгд санаа зорилго нэгтэй, хамтарч сайн ажилласан гэж боддог.

Ч.Амарболд: Ер нь долдугаар сарын 1-ний талаар ярих болно

-Өнөөдөр мөр зэрэгцэж явсан генералуудтайгаа баяраа тэмдэглэж байна. Сэтгэгдлээсээ хуваалцахгүй юу?

-Монгол Улсад генерал цол бий болсоны 70 жилийн ой өнөөдөр тохиож байна. Мөр зэрэгцэж зүтгэж байсан, миний өмнө алба хааж байсан ахмадууд, мөн түүнээс хойш төрсөн дүү нартайгаа уулзаад сайхан байна. Сайхан баярлаж байна.

-Та яг хэзээ генерал цол хүртэж байсан бэ. Дурсамжаасаа хуваалцаач?
-1996 онд генерал цолтой болж байсан. Их л хариуцлагатай, хүндтэй цол. Биднийг бага байхад ч тийм байсан. Тиймээс бид хичээсэн. Монголын төрд тангараг өргөсөн нийт алба хаагч мөрдөстэй хүмүүсд гэж хэлэхэд түмэн олныхоо төлөө зүтгэж байгаа хүндтэй алба шүү. Хэзээд зүтгэснийхээ үр дүн, сайн сайхныг хүртдэг алба гэдгийг хэлмээр байна.

-Сүүлийн үед генерал цол үнэгүйдээд байна гэх боллоо. Энэ талаар?
-Хаа ч генерал цол байдаг. Африкт ч генерал цол байдаг. Тэгэхээр дэлхийн цол гэсэн үг. Монголчуудын хувьд энэ цол хүндтэй, хариуцлагатай цол.

-Генерал цолтнуудын хангамжийг нэмэгдүүлэх талаар Ерөнхийлөгч зарлиг гаргасан. Энэ талаар ямар бодолтой байна. Ер нь генералуудын хангамж хэр байдаг вэ?
-Энэ талаар сонсоогүй. Монголын төр, ард түмэн цэргийн дээд цолтныхоо амьдрал ахуйг харж үзнэ гэвэл сайн шүү дээ.

-Таны биеийн байдал хэр байна?
-Биеийн байдал гайгүй. Гэртээ эмнэлэгт гээд л янз бүрийн байдлаар эмчилгээ хийлгэж байгаа.

-Таньд өршөөл үзүүлээд хэр удчихав?
-Гараад сар гаруй болж байна.

-Долдугаар сарын 1-ний талаар та ярих уу?
-Өнөөдөр энэ талаар яриад хэрэггүй байх. Ер нь бол цаашдаа ярих байх гэж бодож байна.