Мэргэжлийн хяналтын байгууллагаас сүүлийн найман жилийн байдлаар “Байгаль орчныг хамгаалах тухай” хуулийн 27.1.6, 27.1.9, “Ойн тухай” хуулийн 47.2.11 дэх заалтуудыг үндэслэн хууль бусаар бэлтгэгдсэн 21935 м3 мод модон материал, хууль бус мод бэлтгэлд ашигласан 68 автомашин, 112 ширхэг тоног төхөөрөмж, моторт болон тавцант хөрөөг хурааж улсын орлого болгосон байна.

Хяналт шалгалтаар илэрч байгаа зөрчлүүдийг ангилвал:

1.Иргэн, аж ахуйн нэгж:

    Ойгоос зохих эрхийн бичиг, зөвшөөрөл авалгүй дур мэдэн мод бэлтгэсэн, тээвэрлэсэн, худалдсан, худалдан авсан
    Ойн эрхийн бичиг, гарал үүслийн гэрчилгээг засварлан хуурамчаар үйлдсэн, гэрээ, гэрчилгээнд зааснаас хэмжээ хэтрүүлсэн, гарын үсэг, он, сар, өдрийг засварласан, модон материалын төрлийг өөрчилсөн
    Ойн мэргэжлийн байгууллагын тусгаарласан талбайд мод бэлтгэлийн технологийн картыг зөрчиж мод бэлтгэх, заасан талбайг өөрчлөх
    Хуваарийн дагуу ойгоос мод бэлтгэхдээ өөр байгууллага, хувь хүнээр бэлтгүүлдэг, өөрөө бэлтгэх чадваргүй зэрэг зөрчил илэрдэг нь нийт зөрчлийн 40 хувийг эзэлдэг. 

2.Байгаль хамгаалагч нар:

    Ойн эрхийн бичиг бичилтэд алдаа гаргах, гарын үсэг, тэмдгээ хэрэглээгүй байх, он, сар, өдрөө засварласан байх
    Мод бэлтгэлийн талбайг зааж өгөхгүй байх
    Мод бэлтгэлийн талбайг хүлээн авах, хүлээлцэх акт үйлддэггүй
    Төв суурингийн ногоон бүс болон бусад хориглосон газарт эрхийн бичиг бичиж мод олгох зэргээр нийт зөрчлийн 35 хувийг эзэлдэг. 

3.Орон нутгийн захиргаа болон улсын байцаагчид:

    Байгаль хамгаалагч нарын үйл ажиллагаа, гарал үүслийн гэрчилгээ, эрхийн бичиг бичилтэнд тухай бүр хяналт тавихгүй, мод бэлтгэлийн талбайд үзлэг шалгалт хийхгүй орхигдуулах зэргээр хяналт тогтмол тавьдаггүй
    Аймаг, сумын ИТХ, Засаг дарга нар нь тухайн жилд бэлтгэх модны хэмжээг хууль тогтоомж зөрчин шийдвэр гаргаж иргэн, аж ауйн нэгж байгууллагуудыг хууль зөрчих боломж олгож байгаа нь нийт зөрчлийн 25 хувийг эзэлж байна.

Хууль бус мод бэлтгэлтэй холбоотой илэрч буй зөрчлийн тоо сүүлийн найман жилд 5 дахин буурчээ.

2013 оны байдлаар Ойг хамгаалах, зөв зохистой ашиглах, хамгаалах үүрэг бүхий ойн нөхөрлөл 1062, Ойн мэргэжлийн байгууллага, аж ахуйн нэгж 274 байгуулагдаж 22200 орчим ажиллагсадтайгаар үйл ажиллагаа явуулж мод бэлтгэх, боловсруулах аж үйлдвэрийн салбарын бүтээгдэхүүний нэгээс хоёр хувийг үйлдвэрлэж байна.