Өчигдөр Швейцарь Улсын Женев хотноо НҮБ-ын Худалдаа Хөгжлийн Бага Хурал /UNCTAD/-ын гишүүн орнуудын Засгийн газар хоорондын хуралдаан боллоо. Тус хуралдаанд Монгол Улсын хөрөнгө оруулалтын бодлогыг танилцуулах арга хэмжээг зохион байгуулжээ.

Монгол улсын хөрөнгө оруулалтын бодлогыг танилцуулах тус хуралдааныг нээж НҮБ-ын Худалдаа Хөгжлийн Бага Хурлын Ерөнхий нарийн бичгийн дарга Мукхиса Китуеи, Эдийн засгийн хөгжлийн дэд сайд О.Чулуунбат нар нээлтийн үг хэлсэн байна.


Хуралдааны нээлттэй хэлэлцүүлгийн хэсэгт Канад, ИБУИНВУ, АНУ, БНХАУ, ХБНГУ, Прагвай, Франц, Итали, зэрэг улс орны төлөөлөгчид өөрсдийн санал бодлоо илэрхийллээ.

Дээрх төлөөлөгчид UNCTAD-аас Монгол Улсын хөрөнгө оруулалтын бодлогод дүн шинжилгээ хийсэн тайлан гаргасан явдалд болон Монгол улсын засгийн газраас нэг жилийн богино хугацаанд хөрөнгө оруулалтын орчныг сайжруулах чиглэлээр маш чухал арга хэмжээнүүд авч хэрэгжүүлснийг сайшаасан байна. Цаашид зөвлөмжид туссан болон хөрөнгө оруулалтын орчныг сайжруулахад чиглэсэн ажлуудыг тууштай хэрэгжүүлэх, ялангуяа ил тод, тодорхой, тогтвортой байдлыг хадгалж ажиллах нь нэн чухал болохыг онцлов. Мөн Монгол улсад хөрөнгө оруулалт хийх, эдийн засгийн хамтын ажиллагааг цаашид улам өргөжүүлэх хүсэлтэй буйгаа энэ үеэр илэрхийлжээ.