Онцгой байдлын албаны 2014 оны зорилтыг хэрэгжүүлэх ажлын хүрээнд нийслэлийн Онцгой байдлын газраас харьяа дүүргүүдийн Онцгой байдлын хэлтсийн Аврах гал унтраах ангиудын салааны захирагчид, нийслэлийн Аврах ангийн бүлгийн дарга нарт 2 өдрийн сургалтыг зохион байгуулж байна.

 Монгол Улсын хүн амын талаас илүү нь амьдардаг Улаанбаатар хотын иргэдийн аюулгүй байдлыг хамгаалж ажилладаг нийслэлийн Онцгой байдлын газарт салааны захирагч, бүлгийн дарга нар нь гамшгийн голомтод хамгийн түрүүнд очиж нөхцөл байдлыг зөв оновчтой үнэлж, удирдсан баг, хамт олноо удирдлагаар ханган, иргэдээ аюул ослоос авран хамгаалдаг хамгийн чухал албан хаагчид байдаг юм.

Тэдний хувьд цаг минут хамгийн үнэтэй, хүчтэй өрсөлдөгч нь гэж хэлж болно.

Даяаршин байгаа энэ цаг үед Онцгой байдлын албаны албан хаагчдын мэдлэг боловсролыг дээшлүүлэх, хувь хүний хөгжлийг нэмэгдүүлэх нь хамгийн чухал асуудал байсаар байгаа.

Энэ асуудлын хүрээнд нийслэлийн Онцгой байдлын газраас олон арга хэмжээнүүдийг авч хэрэгжүүлэн ажиллаж Бүгд Найрамдах Солонгос, Япон улсуудын хамтын ажиллагааны хүрээнд олон албан хаагч мэргэжлийн ур чадвараа нэмэгдүүлэх, туршлага солилцох сургалтанд хамрагдаж байна.

Нэгдсэн сургалт жил бүр зохион байгуулагддаг бөгөөд энэ жил эрх зүйн болон мэргэжлийн мэдлэг, ур чадварыг дээшлүүлэх, албан хаагчдын сахилга хариуцлагыг сайжруулах, гал унтраах болон гамшгаас хамгаалах бэлтгэл бэлэн байдлыг дээшлүүлэхэд сургалтын зорилго оршино.

Сургалтанд нийслэлийн Онцгой байдлын газрын Аврах гал унтраах 14 анги, аврах ангийн нийт 59 офицер оролцож байна.