Алба хаагчдын чөлөөт цагийг зөв боловсон өнгөрүүлэх, дэлхий дахины түүх, соёл, уран бүтээлтэй танилцаж, оюунлаг цагдаагийн алба хаагч байх зорилгоор тус Цагдаагийн газар дээр шинээр номын санг бий болгож, өрөө тасалгааг засч тохижуулан улмаар нээлтийн ажиллагааг зохион байгууллаа. Нээлтийн ажиллагаанд Төв номын сангийн дарга Ж.Цагаан, Зэвсэгт хүчний 327-р ангийн штабын дарга, дэд хурандаа Т.Ням-Эрдэнэ нар урилгаар оролцсон байна.
Төв номын сангийн дарга Ж.Цагаан сүүлд гарсан шинэ номуудынхаа дээжээс хандивлаж, цаашид хамтран ажиллахаа илэрхийлсэн байна. Уг номын санд алба хаагч бүр ном хандивласан бөгөөд одоогоор 200 гаруй ном цуглараад байна. Мөн албаны сургалтын чиглэлийн 500 гаруй ном сурах бичиг байна. Номын санг сэтгэл зүйч, цагдаагийн ахлах дэслэгч Ж.Батсүрэн хариуцаж ажиллуулан, өдөр тутам алба хаагч нарт карт нээн, номоор үйлчлэх юм байна.