Нийслэлийн удирдах ажилтнуудын ээлжит шуурхай зөвлөгөөн өнөөдөр болж, зарим дүүргийн Засаг нар хугацаа алдалгүй шийдвэрлэх шаардлагатай асуудлуудаа танилцууллаа. Баянгол дүүргийн 3, 4-р хорооллыг бизнес эрхлэгчдийн санаачилгаар “Худалдааны гудамж” болгохоор төлөвлөжээ. Баянзүрх дүүргийн Засаг дарга Д.Пүрэвдаваа Ургах наран, Хужирбулан, Улайстай зэрэг алслагдсан хороод руу иргэд зорчих нийтийн тээврийн асуудал хүндрэлтэй байгаа талаар дүүргийн иргэдээс гомдол ирснийг уламжиллаа. Мөн инженерийн шугам сүлжээний 240 худаг таггүй байгаа гэх асуудлыг шийдвэрлэх шаардлагатай гэсэн юм.
Үүний дагуу нийслэлийн Засаг дарга инженерийн шугам сүлжээний таггүй худгуудыг яаралтай тагтай болгох үүргийг Улаанбаатар хотын Захирагчийн ажлын албаны дарга Б.Бадралд өглөө. Харин алслагдсан хорооруу зорчих иргэдийн нийтийн тээврийн асуудлыг “Нийтийн тээврийн сүлжээ үйлчилгээ”-рүү шилжлүүлж, удахгүй шийдвэрлэнэ гэлээ.
Харин Багануур дүүргийн Цагдаагийн хэлтэс өнөөдрийг хүртэл өөрсдийн байргүй. Дүүргийн тамгын газрын байранд үйл ажиллагаа явуулж байгаа талаар тус дүүргийн Засаг дарга М.Гончигжав мэдээллээ. Мөн Багануур дүүрэгт 100 ортой Канад технологийн цэцэрлэг ашиглалтад орох гэж байгаа. Ашиглалтын зардлыг нийслэлээс шийдвэрлэх шаардлагатай гэсэн юм. Нийслэлийн Засаг дарга тус цэцэрлэгийн үйл ажиллагааны зөвшөөрөл, ашиглалтын зардлыг шийдвэрлэж захирамж гаргахаар боллоо.
Хан-уул дүүргийн нутаг дэвсгэр Төв цэнгэлдэх хүрээлэнгийн хажууд байрлах Монгол Улсын төрийн далбаа далийж, гэмтсэн байна. 2008 онд УИХ-ын гишүүн асан Р.Эрдэнэбүрэн өөрийн хөрөнгөөр Төрийн далбааг байршуулсан бөгөөд ашиглалтыг Хан-Уул дүүрэг хариуцахаар болжээ. Харин таван жилийн дараа гэмтсэн тул хугацаа алдалгүй засах шаардлагатайг дүүргийн Засаг дарга Ж.Ганхуяг уламжиллаа. Далбааны ишийг засварлахад 160 сая төгрөг шаардлагатай гэсэн юм. Нийслэлийн Засаг дарга “Нийслэлээс энэ хөрөнгийг шийдвэрлэх боломжгүй. Урсгал зардал гэхэд хэтэрхий өндөр өртөгтэй байгаа тул Ерөнхий сайдад асуудлыг танилцуулах нь зүйтэй” гэлээ гэж Нийслэлийн Хэвлэл мэдээлэл, олон нийттэй харилцах хэлтсээс мэдээллээ.
