Шинэчлэлийн Засгийн газар Алтанбулаг-Замын-Үүд чиглэлийн хатуу хучилттай 1000 км замыг ойрын хоёр жилд багтаан эргэн төлөх нөхцөлтэйгээр бариулахаар төлөвлөсөн. Иймээс хүйтний улиралд зам тавих стандартыг батлуулах,  хаанаас хайрга, элс зэрэг түгээмэл тархацтай ашигт малтмал олборлож замын бүтээн байгуулалтад ашиглаж болох зэрэгт одооноос анхаарч ажиллана. Мэргэжлийн хяналтын ерөнхий газрын дэд дарга Б.Эрдэнэбилэгт аймаг, нийслэлийн мэргэжлийн хяналтын газрын дарга нартай цахим хурал хийх үеэр ийм чиглэл өглөө. 

Мөн Алтанбулаг боомтын чадавхийг сайжруулж 24 цагийн ажиллагаатай болгох гэж байгаа тул автомат ариутгах төхөөрөмжийг хаана байрлуулах нь зүйтэйг тухайн орон нутгийн мэргэжлийн хяналтын байгууллага судлах юм.

Цахим хурлын үеэр аймаг, нийслэлийн мэргэжлийн хяналтын байгууллагууд өнгөрсөн 14 хоногт ямар ажил хийсэнтэй товч танилцлаа. Салбарын хэмжээнд зарласан “Барилга байгууламжийн чанар,-Хөдөлмөрийн аюулгүй байдал” сарын аян өндөрлөж тайлан мэдээгээ Ерөнхий газарт ирүүлж байна. Энэ аяны хүрээнд аж ахуйн нэгж, байгууллага, иргэдэд хандсан сургалт, үзүүлэх сургууль, хэлэлцүүлэг зохион байгуулж, зөвлөн туслах үйлчилгээ үзүүлж эссе бичлэгийн уралдаан ч зарласан байна. Үүний зэрэгцээ хяналт шалгалтаар илэрсэн зөрчил, дутагдлыг газар дээр нь арилгуулж, заримд нь улсын байцаагчийн албан шаардлага хүргүүлж, болзошгүй осол гэмтэл зэргээс сэргийлжээ. 

Зарим нэг аймгийг эс тооцвол томуу, томуу төст өвчин өмнөх долоо хоногтой харьцуулахад тодорхой хувиар буурсан мэдээтэй байна. Баянхонгор аймгийн Баян-Овоо сум, Хөвсгөл аймгийн Цагаан-Уул, Өвөрхангай аймгийн Гучин-Ус, Ховд аймагт боом, галзуу, дуут хавдар өвчин гарч цөөн тооны мал өвчилсний дагуу хорио цээрийн дэглэм тогтоон, ариутгал халдваргүйжүүлэлт хийж, малыг вакцинжуулжээ. 

Сэлэнгэ аймгийн Ерөө суманд иргэд хууль бусаар алт олборлож байгаа тухай мэдээллийг цагдаагийн байгууллагатай хамтран шалгахад үндэслэлгүй нь тогтоогдсон байна. Харин хориотой арга, хэрэгслээр загас агнаж байсан иргэдийг илрүүлэн холбогдох хууль, тогтоомжийн дагуу арга хэмжээ авчээ. Мөн аймгийн төвд архи, согтууруулах ундаа зарж борлуулдаг 13 аж ахуйн нэгжийн үйл ажиллагааг түр зогсоолоо. 

Хэд хэдэн аймагт ерөнхий боловсролын сургуулийн сурагчдын монгол хэл, математикийн түвшин тогтоох шалгалт хийхэд хүүхдүүд математикийн хичээлдээ хангалтгүй үнэлгээ авсан байна.

Аймаг, нийслэлийн мэргэжлийн хяналтын байгууллагууд хулгайн мод бэлтгэлтэй тэмцэх чиглэлээр Монгол Улсын Ерөнхийлөгчийн гаргасан зарлигийг хэрэгжүүлэх Ажлын хэсэг байгуулан ажилдаа оржээ.

Энэ сарын 30-нд Дархан-Уул аймагт Монгол Улсын Шадар сайд Д.Тэрбишдагвын санаачилгаар “Ард түмэн Та-Хаан” форум болно. Шадар сайдын эрхлэх асуудлын хүрээний зургаан агентлаг, аймгийн Засаг даргын Тамгын газар хамтран бэлтгэлээ базааж байна.