5 дугаар сарын 4. Үүрийн 05:00 цаг. Хот гүн нойрноосоо сэрж амжаагүй энэ үед Ботаникийн цэцэрлэгийн хажууханд байрлах Хууль сахиулахын их сургууль хашаанд хөл хөдөлгөөнтэй байв. Тус сургуулийн бие бүрэлдэхүүн энд цэрэгжсэн бэлэн байдал, аранзны үзлэгт хамрагдаж байгаа нь энэ.
Цэргийн хүний аранзанд хүний хэрэгцээ цөм бүрэн. Өөрөөр хэлбэл гурав хоногийн хоол хүнс, эм тариа, ахуйн хэрэглээний зүйлс энд байх ёстой. Нэг хүний аранз буюу үүргэвч дундажаар 10-15 кг.
Ийнхүү хээрийн бэлэн байдлаа шалгуулснаар “ХСИС 80” марш тактикийн тэмцээн эхэлсэн юм. Энэ жил манай улсад Хууль сахиулахын их сургууль үүсгэн байгуулагдсаны 80 жилийн ой тохиож байгаа бөгөөд ойн хүрээнд марш тактикийн тэмцээн, хээрийн сургуулилтыг цогцоор нь явуулж байгаа нь энэ аж.
Багш, алба хаагчдын дунд Хилийн цэргийн 0151-р ангийн хээрийн сургалт бэлтгэлийн цогцолборт руу явах үед явган маршийн тэмцээн явагдсан бөгөөд эр эмгүй хүнд аранзаа үүрээд 30 км алхжээ.
Ширүүн өрсөлдөөн буюу "Марш тактик"
Түүний маргааш буюу энэ сарын 5-нд “ХСИС-80” нэгдсэн марш тактикийн тэмцээн багуудын үзүүлэх тоглолт, норматив дасгалуудаар эхэллээ. Тэмцээнд тус сургуулийн багш алба хаагчдын 7, сонсогч оюутнуудын 13 баг хурд хүч, цэц мэргэнээ сорьсон юм.
Торон саад доогуур мөлхөх.
Дүүжин тросоор явах.
Ингээд бид барианд орж ирсэн ХСИС-ын ахлагчийн дамжааны багш, ахмад Т.Ганпүрэвтэй цөөн хором ярилцлаа.
-Би маршинд 10 жил гүйж байна. Энэ хугацаанд 17 маршийн тэмцээнд оролцсон. Одоогоор 10 алтан медаль, хоёр мөнгө, нэг хүрэл медальтай. Дасгал сургуулилт байнга хийдэг. "Маршал Тактик"-ийн тэмцээн бол эр хүн, цэргийн хүний ур чадварыг шалгасан том тэмцээн. 10 км-ийн замыг дундаа тактикггүй гүйвэл 30-40 минут гүйнэ. Замдаа саад, тактиктай бол 50-60 минут гүйнэ. Миний хамгийн хурдан гүйсэн минут 58.
-Хэзээнээс цэргийн амьдралаар амьдрах болов?
-Цэргийн амьдралд 10 настайгаасаа хөл тавьсан. Хөгжим сургагчаасаа эхлээд их сургуулийн багш, ахмад цолтой болтлоо 14 дэх жилдээ ажиллаж байна.
Ахлагчийн сургууль цомын эзнээр тодорлоо
Үдээс хойш тэмцээний дүн гарч шагнал гардуулах үйл ажиллагаа боллоо. Тэмцээний багш ажилчдын ангилалын тэргүүн байрыг цагдаагийн хошууч С.Нямжав ахлагчтай, Ахлагчийн сургуулийн баг, эзэлсэн бол хоёрдугаар байранд дэд хурандаа Л.Алтансүх ахлагчтай Шүүхийн шийдвэр гүйцэтгэлийн сургуулийн баг, гуравдугаар байранд ахмад Ч.Жаргалсайхан ахлагчтай Ерөнхий эрдмийн сургуулийн баг тус тус шалгарчээ.
Сонсогчдын ангилалд тэргүүн байр эзэлсэн ХСИС-ийн багш, ахлах дэслэгч Ч.Баттөр. "Бид бэлтгэл сургуулилтын сарын өмнөөс базааж эхэлсэн. Манай сургууль гуравдахь удаагаа алтан медаль авч байгаа. Энд анх удаагаа оролцож байгаа хүүхдүүд, урд нь оролцож байсан хүмүүс ч байгаа. Бэлтгэл сайн байлаа. Даалгавруудаас саадын зурвасаар гараад тросоор доошоо буух бага зэрэг хэцүү байлаа" хэмээн сэтгэгдлээ хуваалцлаа.
Дашрамд дуулгахад ХСИС-ын Хилийн сургуулийн тактикийн хээрийн сургалт энэ сарын 9-ныг дуустал үргэлжилнэ. Энэхүү сургалтаар хил орчимд гарсан хэрэг зөрчлийг арилгахдаа цэрэг цагдаагийн байгууллагуудтай хамтран ажиллах талын мэдлэгийг багш ажилчид, сонсогч оюутнуудад олгох аж.
24tsag.mn
