Сүхбаатар аймгийн Гэмт хэргээс урьдчилан сэргийлэх ажлын зохицуулах зөвлөлийн 2014 оны төлөвлөгөөний  хүрээнд Аймгийн Прокурорын газраас санаачлан  аймгийн төр, захиргаа, хууль хяналтын байгууллагад хөдөө сумдын иргэдэд хууль сурталчлах чиглэлээр ажилласан байна.

Аймгийн АЗДТГ-ын Хууль зүйн хэлтэс, Аймгийн Прокурорын газар, Шүүх, ШШГА, Хүүхэд гэр бүл хөгжлийн хэлтэс, Цагдаагийн хэлтэс, Аймгийн өмгөөлөгчдийн зөвлөл, Аймгийн Иргэдийн төлөөлөгчдийн хурлын мэргэжилтэн, хэвлэл мэдээллийн төлөөлөл нийлсэн 20 хүний бүрэлдэхүүнтэй ажлын баг Сүхбаатар аймгийн зүүн болон урд талын сумд болох Сүхбаатар, Асгат, Эрдэнэцагаан, Дарьганга, Наран, Онгон, Баяндэлгэр, Халзан, ХЦ-ийн 0146, 0184-р анги  зэрэг 8 сум, 2 хилийн отрядад ажиллан орон нутгийн удирдлагууд, иргэдтэй уулзалт зохион байгуулж, нийт 600 гаруй хүнд хууль сурталчлан, тэдний санал бодлыг сонсон, шийдэж болох асуудлыг газар дээр нь шийдвэрлэн, өргөдөл гомдол хүлээн авч, сумдын иргэдийг хуулийн мэдээ мэдээллээр хангасан юм. Түүнчлэн гэмт хэргээс урьдчилан сэргийлэх талаар санамж тараан, сумдын салбар зөвлөлүүдийн  ажилтай танилцаж заавар зөвлөгөө өгч ажиллалаа.  Гэмт хэргээс урьдчилан сэргийлэх ажлыг зөвхөн хуулийн байгууллагуудын ажил гэж тогтсон хэвшлийг өөрчлөхөд энэ удаагийн ажил түлхэц болсон бөгөөд төрийн болон төрийн бус байгууллага, иргэд өөрсдөө хамтдаа тэмцэх нь маш чухал юм  гэдгийг иргэд ухамсарлан ойлгосноо дуулгаж, багийн бүрэлдэхүүнд талархаж байгаагаа илэрхийлжээ.

Гэмт хэргээс урьдчилан сэргийлэх ажлын зэрэгцээ  тус прокурорын газраас 8 сумдын хэсгийн төлөөлөгч нарын гэмт хэргийн шинжтэй гомдол мэдээлэл шалгаж буй байдал болон  Захиргааны зөрчлийн хэрэг бүртгэлтийн ажиллагаа явуулах эрх бүхий 17 улсын байцааагч нарын  ажлыг газар дээр нь шалгаж,  холбогдох  хууль тогтоомжоор сургалт зохион байгуулан ажилласан байна.

Сумдад ажиллах хугацаанд иргэдээс 4 гомдол, хүсэлт хүлээн авч газар дээр нь 2  шийдвэрлэн, 2 шалгасны эцэст хариу мэдэгдэхээр болсон байна.