Монголд анх удаа тавигдаж буй байгалийн чулуун хучилттай авто замуудын түүчээ ашиглалтад орж эхэллээ.

Энэ онд нийслэлийн замын сангийн 2 тэрбум 205 сая төгрөгийн хөрөнгө оруулалтаар нийт 9 байршилд 1.83 км авто зам барих юм.

Одоогийн байдлаар Гандангийн баруун хаалганаас баруун тийш явах зам, Анкарагийн гудамжийг Лааганы гудамжтай холбох зам буюу Бишрэлт зочид буудлын урдуурх зам, Эрхүүгийн гудамжийг Денверийн гудамжтай холбох зам буюу 11-р хорооллын урдуур АНУ-ын ЭСЯ-ны зүүн талын зам хүртэлх авто замуудыг барьж нээгээд байна.

Харин БГД, 2-р хороо, Замчдын гудамжнаас вокзалын арын цэцэрлэгийн гудамж хүртэл, БГД, 4-р хороо, Замчдын гудамжнаас вокзалын арын цэцэрлэгийн гудамж хүртэл, БЗД, 6-р хороо, Энхтайваны өргөн чөлөөг Дамдинсүрэнгийн гудамжтай холбох, СБД, 1-р хороо, Жамъян гүний гудамжнаас Гэндэнгийн гудамж хүртэл, СБД, 7-р хороо, Бага тойрууг МУИС-ийн арын гудамжтай холбох, ЧД, 1-р хороо, Жигжиджавын гудамжийг Энхтайваны өргөн чөлөөтэй холбох замуудыг энэ онд барьж гүйцэтгэх аж.

Байгалийн чулуу хучилттай авто зам нь чанарын хувьд эдэлгээ удаантай, борооны усыг шингээж нэвчүүлэх, шугам сүлжээний шинэчлэлтийг зам эвдэхгүйгээр хийх болон хүйтэн сэрүүн улиралд ч барих боломжтойгоороо давуу юм.