Нийслэлийн 21 байршилд гэр хорооллын дахин төлөвлөлтийн төсөл хэрэгжиж байгаа. 2014 оны 4-р улиралд 4000 орчим айлын орон сууцыг ашиглалтад оруулах төлөвлөгөөтэйгээр төсөл хэрэгжүүлэгч аж ахуйн нэгжүүд ажиллаж байгаа бол зургаан компани төсөл хэрэгжүүлэх эрх бүхий “Батламж”-ийг нийслэлийн Засаг даргаас гардаж авлаа.Гэр хорооллын дахин төлөвлөлтийн төслийн журамд заасан шалгуурыг хангаж, сонгосон талбайд газар, үл хөдлөх хөрөнгө өмчлөгч, эзэмшигч иргэдтэй нэг бүрчлэн уулзаж хоёр талт гэрээ байгуулсны үндсэн дээр төсөл хэрэгжүүлэх эрхээ авч байгаа юм. Үүний дараа тус компаниуд иргэдтэй гурван талт гэрээ байгуулан, хэсэгчилсэн ерөнхий төлөвлөгөөгөө батлуулснаар бүтээн байгуулалтын ажлаа эхлүүлэх бүрэн эрхтэй болно.
Гэр хорооллын дахин төлөвлөлтийн төслийг хэрэгжүүлж буй Хера пропертийз ХХК өмнө нь эрх авсан газартаа нэмж Сонгинохайрхан дүүргийн 5, 6, 7 дугаар хороо Ханын материал орчмын хэсэгчилсэн ерөнхий төлөвлөгөө ГХДТ-2013/1 багцын Б1, В1 хэсэгчилсэн талбай 28.5 га газрын эрх авсан бол Грийн ресурс констракшн ХХК Баянгол дүүргийн 10-р хороо Бичил VII орон сууцны хорооллын 30.6 га, Очир ням проперти девелопмент ХХК Баянгол дүүргийн 11, 22 дугаар хорооны нутаг дэвсгэр Бичил VII орон сууцны хорооллын 26,7 га, Ди Ви Жи Эйч ХХК Баянгол дүүргийн 11-р хороо Бичил VII орон сууцны хорооллын 35,9 га, Тоб групп ХХК Сонгинохайрхан дүүргийн 28-р хороо 3,07 га, Их Өрөө ХХК Баянзүрх дүүргийн 2,4 дүгээр хороо Мамба дацан орчимд 26 га газарт дахин төлөвлөлтийн төсөл хэрэгжүүлнэ.
Нийслэлийн Засаг дарга төсөл хэрэгжүүлэх эрх бүхий “Батламж”, нийслэлийн Засаг даргын захирамжийг гардуулах үеэр “Гэр хорооллын дахин төлөвлөлт гэдэг амаргүй ажилд сэтгэл, зориг гарган нийслэлийн түүхэн бүтээн байгуулалтад өөрсдийн хувь нэмрээ оруулах гэж байгаа та бүхэнд нийслэлчүүдийнхээ нэрийн өмнөөс талархал илэрхийлье. Та бид иргэдтэйгээ хамтран энэ төслийг хэрэгжүүлж чадна гэдэгт итгэлтэй байна. Хотын захиргааны зүгээс бүхий л талаар дэмжин ажиллах болно” гэдгийг онцлон хэлсэн юм гэж Нийслэлийн Хэвлэл мэдээлэл, олон нийттэй харилцах хэлтсээс мэдээллээ.
