Улаанбаатар хотын иргэдэд шинээр 52 байршилд гэр бүлийн хэрэгцээний газар олгох ажлыг анх удаа цахимаар явуулах гэж байгаа билээ. Тэгвэл өнөөдөр Нийслэлийн өмчийн харилцааны газраас энэ ажлын явцын мэдээллийг өглөө.

Одоогоор газар авах хүсэлтэй иргэдийг цахимаар бүртгэх болон сонгон шалгаруулах журам хараахан батлагдаагүй байна. Тодруулбал цахимаар явуулах журмыг өнгөрсөн сард  Нийслэлийн удирдлагын зөвлөлийн хуралд танилцуулсан бөгөөд энэ сарын 29-нд болох НИТХ-ын ээлжит хурлаар оруулан батлах аж.

Мөн дээрх газруудад хийгдэх ёстой хэсэгчилсэн ерөнхий төлөвлөгөөний зураг хараахан хийгдэж дуусаагүй байгааг албаныхан хэллээ.

52 байршилд нийслэлийн долоон дүүргийн 15 мянган га газар хамрагдаж байгаа. Олон иргэдийг хамруулах үүднээс 0,07 га биш 0,05 га газар өмчлүүлэхээр журамд тусгасан бөгөөд урьдчилсан тооцоогоор шинээр 160 гаруй мянган иргэн газартай болох гэнэ.

Газар өмчлөх хүсэлтэй иргэдэд дараах шаардлагуудыг тавьжээ. Үүнд:

1.    Нийслэлд болон хөдөө орон нутагт газар өмчлөөгүй байх
2.    НӨХГ-аас хөдөө орон нутагт газар өмчлөхийг хүссэн лавлагаа аваагүй байх
3.    2013 оны 05 сарын 30-наас өмнө нийслэлд шилжин ирсэн байх

Дээрх шаардлагыг хангасан иргэд дүүрэг харгалзахгүй бүртгүүлэх боломжтой ба бүртгэл www.umch.ub.gov.mn  сайтаар явагдана. Ингэхдээ тодорхой асуулгуудад үнэн зөвөөр хариулах бөгөөд бүртгүүлсний дараа таны гар утсанд баталгаажуулах код ирэх аж. Кодоо ашиглан бүртгэлээ идэвхжүүлснээр дараагийн шат буюу сонгон шалгаруулалтад оролцох эрхтэй болно.

Сонгон шалгаруулалтын хувьд тусгай программын аргаар явагдах ба систем тухайн байршилд бүртгүүлсэн хүмүүсээс санамсаргүй байдлаар сонгох аж. Программын найдвартай ажиллагааг Кибр аюулгүй байдлын газар хянах юм байна.

Түүнчлэн сонгон шалгаруулалт нэг бус удаа явагдана. Өөрөөр хэлбэл байршлуудад ээлж дараалан сонгон шалгаруулалт зарлагдана гэсэн үг. Эхний сонгон шалгаруулалтад оролцсон ч газар өмчлөх эрх авч чадаагүй иргэд дараагийн шалгаруулалтад оролцох боломжтой гэнэ.

Ингээд бид НӨХГ-ын Газар өмчлөл, өмчийн менежментийн хэлстийн дарга Т.Соёлтхүүгээс дараах тодруулгыг авлаа.
 
-Та ерөнхий төлөвлөгөө хийгдэж байгаа гэлээ. Сургууль цэцэрлэг дэд бүтцийн асуудлыг хэрхэн шийдэж байгаа вэ?

-Ерөнхий төлөвлөгөө боловсруулах өөрийн дүрэм журам байгаа. Түүний дагуу зам харгуй, нийтийн үйлчилгээний газрууд сургууль цэцэрлэг ногоон байгууламжууд нь хийгдэнэ.

-Иргэдийг нийслэлд шилжиж ирсэн хугацааг нарийвчлан заасан байсан. Энэ талаар?

-2013 оны 05 сарын 30-наас өмнө буюу НИТХ-аас гарсан 52 байршилд газар өмчлүүлэх тухай захирамж гарснаас хойш нийслэлд ирж суурьшсан хүмүүст газар олгохгүй гэсэн журамтай юм.

-0,07 га биш 0,05 га газар өмчлүүлэх талаар яриач?

-Хуулиндаа нийслэлд гэр бүлийн зориулалтаар газар өмчлүүлэх хэмжээг зааж өгсөн байгаа. Ер нь хүмүүс 0,7 гэж буруу яриад байдаг юм. 0,07 га газар буюу 700 мкв газар шүү дээ. Газар өмчлүүлэх хуулийг та бүхэн сайн уншаад үзвэл 0,07 хүртэлх гэж бичсэн байгаа. Нийслэлийн төр захиргааны байгууллага 0,07 хүртэл хэмжээгээр өөрсдөө хэмжээгээ тогтоогоод өмчлүүлэх боломжтой гэсэн үг. Өнөөдрийг хүртэл газар өмчлүүлсэн практикийг аваад үзвэл бүгд 0,07 га авсан юм байхгүй. Одоо манай гэр хороололд байгаа хашааны газрууд дундажаар 300, 400 мкв орчим байдаг. Харин энэ 52 байршилд 0,05 га газраар ерөнхий төлөвлөгөө нь хийгдэж байгаа. Тиймээс үүнд хууль зөрчсөн зүйл байхгүй. Аль болох олон иргэнд газар өмчлүүлэх зорилготой юм.

24tsag.mn