МХЕГ-ын Хүнсний аюулгүй байдлын үндэсний лавлагаа лабораторийн сорилтын дүнгээр БНХАУ-аас импортлогдож буй зарим төрлийн хүнсний бүтээгдэхүүнүүд болох бөгжтэй болон  тэсэрдэг чихэрт нян илэрчээ.

Шинжилгээний үзүүлэлтээр нянгийн бохирдолтой байсан бол химийн шинжилгээгээр зарим улсад хориглосон болон хүнсэнд хэрэглэхэд зөвшөөрөгдөх хэмжээ шаарддаг, ходоодны хямрал, харшил арьсны тууралт үүсгэж болзошгүй аюултай байсан байна.

Тиймээс гарал үүсэл нь тодорхойгүй, дагалдах баримт бичиггүй, аюулгүй байдлын шаардлага хангаагүй, жижиглэнгээр савласан эдгээр нэрийн бүтээгдэхүүнийг хилээр нэвтрүүлэхгүй, хориглох арга хэмжээ авахыг анхааруулжээ.

Тэгвэл ходоодны хямрал, харшилтай болгодог гэх эдгээр хятадын бүтээгдэхүүнүүд ЕБС-иудын ойр орчмын дэлгүүрүүдэд хэр их байдагийг сурвалжиллаа.

Улмаар Ерөнхий боловсролын зарим сургуулиудын ойр орчмын дэлгүүрүүдээр явж тандалт маягийн зүйл хийлээ. Ингээд таван дэлгүүрээр ороход түүний хоёрт нь дээрх бүтээгдэхүүнүүд зарагдаж байсан юм.

Бид уг барааг худалдаалж байсан дэлгүүрийн худалдагчаас бүтээгдэхүүний үнийг тодруулахад 150 төгрөг гэв. Улмаар эл бүтээгдэхүүнийг зарж борлуулахыг хориглосон талаар сонсож мэдсэн үү гэхэд "Огт тийм зүйл сонсоогүй. Угаасаа энэ бүтээгдэхүүнээс олон тоогоор нь, их хэмжээгээр авчраагүй" гэв.

Юутай ч энэ мэт зарим жижиг дэлгүүрүүдэд хүүхдийн эрүүл мэндэд хортой бүтээгдэхүүн зарагдаж байхыг үгүйсгэхгүй. Тиймээс иргэн та энэ төрлийн бүтээгдэхүүн зарж буй дэлгүүрээр үйлчлүүлвэл зарж болохгүй, хориглосон зүйл гэдгийг нь анхааруулахгүй бол таны хүү, охин хэн ч эл чихрийг хэрэглэж болох юм шүү.