Манай улсад айлчилж байгаа БНСУ-ын Хөдөлмөрийн аюулгүй ажиллагаа, эрүүл ахуйн агентлагын /КОША/ бодлого  хариуцсан ерөнхий захирал Им Ён Соб тэргүүтэй төлөөлөгчдийг Мэргэжлийн хяналтын ерөнхий газрын дэд дарга Д.Гүньбазар хүлээн авч уулзав.

Талууд Харилцан ойлголцлын Санамж бичгийн хүрээнд 2014 онд хамтран ажиллах үйл ажиллагааны төлөвлөгөөний биелэлтийн талаар санал солилцсон байна.  Үйлдвэрлэлийн осол, мэргэжлээс шалтгаалсан өвчлөлийг бууруулсан арга туршлагаасаа хуваалцан оюуны хөрөнгө оруулалт хийхийн зэрэгцээ явуулын сургалт, сурталчилгаа хийх иж бүрэн тоноглол бүхий автобусыг буцалтгүй тусламжаар өгсөнд дэд дарга Д.Гүньбазар талархал илэрхийлэв.

Мөн гуравдугаар сард Улаанбаатар хотноо МҮЭХ, ХБНГУ-ын “Фридрих Эбертийн сан”, МХЕГ  хамтран зохион байгуулсан “Хөдөлмөрийн аюулгүй байдал, эрүүл ахуй - 2014” улсын байцаагчдын зөвлөгөөнд “КОША” байгууллагын төлөөлөгч оролцсон үр дүнтэй ажил болсныг  тэмдэглэлээ.

Ойрын хоёр сард мэргэжлийн хяналтын байцаагч нар “КОША” байгууллагын Судалгааны хүрээлэнд солонгосын зардлаар сургалтад хамрагдах юм. Цаашид жил бүр БНСУ-д туршлага судлуулж, сургалтад хамрагдах, судалгааны ажил хийх байцаагчдын тоог нэмэх, солонгосын мэргэжилтэнг Монгол Улсад  ирэх бүрт  сургалтыг практиктай хослуулж явуулахаар харилцан тохиролцлоо.  

          Хоёр байгууллагын цаашдын харилцаа, хамтын ажиллагаа улөм өргөжин хөгжинө гэдэгт итгэлтэй байгаагаа БНСУ-ын Хөдөлмөрийн аюулгүй ажиллагаа, эрүүл ахуйн агентлагын бодлого хариуцсан ерөнхий захирал Им Ён Соб илэрхийлсэн байна. Мөн Мэргэжлийн хяналтын ерөнхий газарт бүх талын дэмжлэг, туслалцаа үзүүлнэ гэдгээ хэллээ. БНСУ-ын төлөөлөгчдийн бүрэлдэхүүнд тус байгууллагын Гадаад хамтын ажиллагааны төв болон  Аюулгүй ажиллагааг хөгжүүлэх газрын орлогч дарга нар багтжээ.