Өнөөдөр ОХУ-ын “Метровагонмаш” үйлдвэрт үйлдвэрлэгдсэн РА-2 серийн нийтийн тээврийн үйлчилгээний “railbus” төмөр замын автобусыг хүлээн авлаа. Тэгвэл энэ үеэр Улаанбаатар төмөр замын зорчигч тээврийн албаны хүнээс зарим зүйлийг тодрууллаа.

- Төмөр замын автобусыг хүлээн авлаа. Цаашлаад замын асуудлыг хэрхэн зохицуулах вэ?
-Толгойт-Улаанбаатарын хооронд 3.5 км хос зам тавьж байгаа. Гүүрээ ирэх сарын 6 гэхэд бид холбоно. Тэгэхээр Толгой-Улаанбаатар хос төмөр замтай болж байгаа гэсэн үг. Ирэх жил Хотын захиргаа газрыг нь чөлөөлж өгвөл бид Улаанбаатар-Амгалан хооронд хоёр дахь хос замаа тавина. Ингэсэн тохиолдолд  “railbus" автобус өдөрт 6 биш түүнээс дээш явна. Нэг замтай учир өдөрт гурван удаа явах боломжтой байгаа.

Тэгэхээр Хотын захиргаанаас газар чөлөөлж өгөхийг хүсч байгаа. Ингэснээр хос зам барина.  Мөн  “railbus"-ын зорчигчийн тавцан барих хөрөнгө оруулалтаа хүлээж байна. Энэ хурдан шуурхай шийдэгдвэл ажил шуурхай явагдана.

-Хөрөнгө оруулалт шаардлагатай гэлээ. Хэчнээн хэмжээний төсөв хэрэгтэй вэ?
-Улаанбаатар-Толгойтын хооронд хос зам барихад 3.5 тэрбум төгрөг зарцуулчихаад байна. 360 сая төгрөгөөр тавцан барих гэж байна. Үүнийг Э.Бат-Үүл дарга шийдэж байна. Одоо ИТХ-аар оролцоод хэлэлцүүлчихсэн. Мөнгө манайд шилжих дутуу байгаа.

-Энэ замаар зөвхөн “railbus"-аас гадна ачаа тээвэрч явна биз дээ?
-Бүх үйлчилгээний гал тэрэг явна.