Монгол улсад ХАА-н бирж байгуулагдаад жил гаруй хугацаанд үйл ажиллагаа явуулж байна. Үйлдвэр, хөдөө аж ахуйн яам, Хөдөө аж ахуйн биржийн зохицуулах зөвлөл, “Хөдөө аж ахуйн бирж” ХХК, Хөдөө аж ахуйн гаралтай бараа, түүхий эд бэлтгэн нийлүүлэгч мэргэшсэн брокеруудын нэгдсэн холбоо хамтран өнөөдөр “Хөдөө аж ахуйн биржийн үйл ажиллагаа ба зах зээлд оролцогчид” сэдэвт хэлэлцүүлгийг “Чингис” зочид буудлын хурлын танхимд зохион байгууллаа.
Хэлэлцүүлэгт Үйлдвэр, хөдөө аж ахуйн яам, зах зээлд оролцогчдын төрийн болон төрийн бус байгууллагуудын төлөөллийг бүрэлдэхүүндээ багтаадаг хөдөө аж ахуйн биржийн Зохицуулах зөвлөлийн гишүүд, Санхүүгийн зохицуулах хороо, Сангийн яам, татвар, гаалийн байгууллага, банкны төлөөлөл, Хөдөө аж ахуйн бирж, брокерын компанийн ажилтнууд оролцсон юм.
ХАА-н талаар төрөөс баримталж буй бодлого, зах зээлд оролцогч ба зохицуулалт, ХАА-н биржийн арилжааны зуучлагч /брокер/-ийн үйл ажиллагааны зохицуулалт зэрэг илтгэл, танилцуулгаас гадна Хөдөө аж ахуйн биржийн 2013 оны үйл ажиллагааны талаарх мэдээлэл, өнөөгийн байдал, цаашдын зорилтын талаар “Хөдөө аж ахуйн бирж” ХХК-ийн гүйцэтгэх захирал Ж.Эрдэнэбатын мэдээлэлд оролцогчид анхаарлаа хандуулж холбогдох асуудлуудаар санал бодлоо солилцон хэлэлцүүлэг өрнүүллээ.
Хэлэлцүүлэгт оролцогчид хөдөө аж ахуйн бирж үүсэн байгуулагдаж зарим бараа, түүхий эдийг арилжих болсноор түүхий эдийн зах зээлийн бодит үнэ тогтож үнэ ил тод болох, тогтворжих, түүхий эд бэлтгэлийн үйл ажиллагааг өнөөгийн зохион байгуулалттай зах зээлийн арга хэрэгслээр хөтлөн явуулах, зах зээлийн эрэлт, нийлүүлэлтийн тоо хэмжээг зөв илэрхийлэх, энэ салбарын хүрээнд далд эдийн засаг дахь мөнгөний урсгалыг төлбөр, тооцооны системээр дамжуулах, биржийн давуу талыг олон нийтэд ойлгуулах зэрэг үр дүнд хүрсэн байна.
Цаашид биржийн арилжааны зуучлах үйл ажиллагааг орон нутагт хүртээмжтэй болгох, цахим арилжааны системийг нэвтрүүлж мэргэжлийн оролцогчдын арилжаанд оролцох боломжийг өргөтгөх, биржийн байнгын бус гишүүний чадавхийг сайжруулахад дэмжлэг үзүүлэх, түүхий эдийн стандартыг хангуулах замаар биржийн барааны чанарыг ахиулах, бараа, түүхий эдийн гарал, үүслийг тодорхойлох, агуулах, лаборатор, тээврийн нөхцөлийг сайжруулах зэрэг арга хэмжээг авч хэрэгжүүлэх шаардлагатай гэж үзжээ.
Хэлэлцүүлгийн явцад оролцогч талуудаас гарсан саналыг нэгтгэн дүгнэж Биржийн зохицуулах зөвлөлийн зөвлөмжид тусган холбогдох байгууллагуудад хүргүүлэн хэрэгжүүлэх ажлыг зохион байгуулахаар тогтсон байна.
24tsag.mn
