Улаанбаатар хотод шинээр 52 байршилд гэр бүлийн хэрэгцээний газар өмчлүүлэх ажил иргэдийн дунд хүлээлт үүсгээд байгаа. Энэ ажлыг цахимаар явуулах бөгөөд одоогоор НИТХ-аар цахим бүртгэл явуулах, сонгон шалгаруулах журам батлахыг хүлээж байгаа юм.

Гэтэл өнгөрсөн амралтын өдрүүдэд иргэдийн дунд цахим бүртгэл эхэлсэн гэх мэдээлэл цацагдсан байна. Энэ талаар НӨХГ-ын Газар өмчлөлийн хэлтсийн дарга Т.Соёлхүү “Программ бэлэн болчихсон болохоор зарим хүмүүс цахим хаягаар ороод бүртгүүлчихсэн байсан. Энэ бүртгэлийг хүчингүй гэж үзэж байгаа. Учир нь журам гарсны дараа олон нийтэд зарлаж байж бүртгэж эхлэх юм. Бүртгэл эхлэхээс 15 хоногийн өмнө олон нийтэд зарлана" хэмээн өчигдөр болсон хэвлэлийн бага хурлын үеэр мэдэгдлээ.

Шинээр 52 байршилд газар өмчлүүлэх ажлын тухайд

52 байршилд нийслэлийн долоон дүүргийн 15 мянган га газар хамрагдаж байгаа. Олон иргэдийг хамруулах үүднээс 0,07 га биш 0,05 га газар өмчлүүлэхээр журамд тусгасан бөгөөд урьдчилсан тооцоогоор шинээр 160 гаруй мянган иргэн газартай болох гэнэ.

Газар өмчлөх хүсэлтэй иргэдэд дараах шаардлагуудыг тавьжээ. Үүнд:

1.    Нийслэлд болон хөдөө орон нутагт газар өмчлөөгүй байх
2.    НӨХГ-аас хөдөө орон нутагт газар өмчлөхийг хүссэн лавлагаа аваагүй байх
3.    2013 оны 05 сарын 30-наас өмнө нийслэлд шилжин ирсэн байх

Дээрх шаардлагыг хангасан иргэд дүүрэг харгалзахгүй бүртгүүлэх боломжтой ба бүртгэл www.umch.ub.gov.mn  сайтаар явагдана. Ингэхдээ тодорхой асуулгуудад үнэн зөвөөр хариулах бөгөөд бүртгүүлсний дараа таны гар утсанд баталгаажуулах код ирэх аж. Кодоо ашиглан бүртгэлээ идэвхжүүлснээр дараагийн шат буюу сонгон шалгаруулалтад оролцох эрхтэй болно.

Сонгон шалгаруулалтын хувьд тусгай программын аргаар явагдах ба систем тухайн байршилд бүртгүүлсэн хүмүүсээс санамсаргүй байдлаар сонгох аж. Программын найдвартай ажиллагааг Кибр аюулгүй байдлын газар хянах юм байна.

Түүнчлэн сонгон шалгаруулалт нэг бус удаа явагдана. Өөрөөр хэлбэл байршлуудад ээлж дараалан сонгон шалгаруулалт зарлагдана гэсэн үг. Эхний сонгон шалгаруулалтад оролцсон ч газар өмчлөх эрх авч чадаагүй иргэд дараагийн шалгаруулалтад оролцох боломжтой гэнэ.