Мэргэжлийн хяналтын ерөнхий газар, аймаг, нийслэлийн хяналтын байгууллагын удирдлага, байцаагч нар энэ өдрүүдэд цахим сургалтад хамрагдан эрсдэлийн удирдлагын талаархи олон улсын туршлагатай танилцаж байна.

Олон улсын санхүүгийн корпорацийн зөвлөх Флорентин Бланк “Олон улсын эрсдэлд суурилсан хяналт шалгалтыг хэрэгжүүлж байгаа туршлага”, “Хяналтын байгууллагын ухаалаг зохицуулалт”, “Улсын байцаагч мэргэжил” сэдвээр хичээл зааж эхэллээ.  

Сургалтын нээлтэд Монгол Улсын Шадар сайд Д.Тэрбишдагва, Олон улсын санхүүгийн корпорацийн Монгол дахь суурин төлөөлөгч Нгуэн Туен нар оролцсон байна. Шадар сайд “Эрсдэл бүх улс оронд байдаг. Гагцхүү хэрхэн урьдчилан сэргийлэх чиглэлээр удирдлага, аж ахуйн нэгж, байгууллага, иргэд юу хийж байгаагаас их зүйл шалтгаална” гэж хэллээ. Мөн төр, засаг ч аливаа шийдвэр гаргахдаа эрсдэлээ эрэмбэлж гол хэдэн зүйлд анхаарах ёстойг тэмдэглэсэн байна.

Олон улсын санхүүгийн корпорацийнхан энэ сургалтын хүрээнд Мэргэжлийн хяналтын ерөнхий газрын Эрсдлийн удирдлагын багтай хамтран уулзалт зохион байгуулсан. Энэ нь “Эрсдэлийн удирдлагын стратеги”, “Хяналт шалгалтын обьектын эрсдэлийн үнэлгээ, хяналт шалгалтын төлөвлөлт хийх журам”-ын төсөл, “Мэргэжлийн хяналтын байгууллагад эрсдэлийн удирдлагын тогтолцоо, бүтэц бүрдүүлэх” танилцуулгад зөвлөмж өгөх зорилготой байлаа.  

Олон улсын санхүүгийн корпораци нь дөрвөн жилийн өмнөөс Мэргэжлийн хяналтын байгууллагатай өөрчлөлт, шинэчлэлт, эрсдэлийн удирдлагын чиглэлээр хамтран ажиллаж байна.