Хэрвээ бид хүдрээ барж, хэрмээ хядаж, загасаа дэлбэлж, ирвэсээ устгасаар байх юм бол энэ сайхан амьтдыг амьдаар нь биш сургаар л мэдэх хойч үе маань “Яагаад тэр үед нь аварч, авч үлдээгүй юм бэ?” гэдэг асуултыг заавал тавих болно. “Яагаад та тэр үед юу ч хийгээгүй юм бэ?” гэдэг асуултад хариулах хэрэгтэй болно гэж өнөөдөр Төрийн банкны төв байранд үзэсгэлэнгээ дэлгэсэн “Хүрээлэн” төслийн удирдагч, байгалийн гэрэл зурагчин У.Ганбаяр хэллээ.
 Харин Төрийн банкны гүйцэтгэх захирал Д.Батсайхан "Хойч дараа үеэ байгальдаа хайхрамжгүй биш хайртай болгохын тулд гэрэл зураг, кино урлагаар дамжуулан, сошиал суваг, ТВ оролцуулан ЭКО БОЛОВСРОЛ ОЛГОХ нь зөв юм гэж Төрийн банк, “Хүрээлэн” төсөл хамтран шийдсэн" гэж ярьж байна. Энэ бол “Хүрээлэн” төсөл, Төрийн банкны хамтарсан “Эко боловсрол олгох аян-2014” –ийн нээлт дээр хэлэгдсэн үгс. Уг аяны хүрээнд Ерөнхий боловсролын сургуулиуд дээр “Амьд ертөнцийн цуврал” гэрэл зургийн үзэсгэлэн гаргах, хүүхдүүдийн дунд гар болон гэрэл зураг, эссе, асуулт хариултын уралдаанууд зарлан дүгнэх зэрэг ажлууд хийгдэх юм.

“Эко боловсрол олгох аян”-ы нэг шатны ажил болгон Төрийн банкны Facebook хуудсанд “Эх дэлхий ба бидний хүүхдүүд” сэдэвтэй фото зургийн уралдаан зарласан байна. Хүүхэд, байгалийн харилцан шүтэлцээг харуулсан нийт 111 фото зураг иржээ. Хамгийн олон санал авсан 25 зургаас эхний 3 байрыг мэргэжлийн гэрэл зурагчдын тусламжтайгаар шалгаруулахад 2 настай Б.Цэцээхэн, Г.Номин, 8 сартай Б.Буян-Эрдэнэ нарын зургууд шалгарч iPhone 5S, iPad Mini, Nikon брэндийн гэрэл зургийн аппрат зэргийн эзэд болсон байна. Мөн тэднийг мэргэжлийн гэрэл зурагчид, баримтат киноныхон, билологичид нэгдсэн Байгаль, зэрлэг амьтан хамгаалах үндэсний нийгэмлэг гарын бэлгээрээ урамшуулжэээ.
 БЗАХҮНийгэмлэг нь 2013-2016 онд үргэлжлэх “Монгол орны зэрлэг амьтдын фото болон видео сан бүрдүүлэх төсөл”-ийг хэрэгжүүлж эхлээд байна. 2013 оны 10 дугаар сараас хойш тэд Монгол орноороо нийт 33 000 километрийн аялал хийж, 66 зүйлийн зэрлэг амьтдын гэрэл зураг, дүрс бичлэг авч, ТВ-ийн 11 цуврал нэвтрүүлэг бэлтгэн цацаад байна. Энэ бол Монголд байгаль, зэрлэг амьтдын гэрэл зураг, дүрс бичлэгийн сан бүрдүүлж буй анхны томоохон төсөл бөгөөд өөрсдийн нөөц бололцоо, сайн санаат хандивлагч, дэмжигчид, түүний дотор нийгмийн хариуцлагаа ухамсарлан хэрэгжүүлж байгаа ТӨРИЙН БАНКНЫ дэм туслалцаатайгаар хэрэгжүүлж байгаа билээ.