Энэ сарын 8-ны өглөө Нарны замын явган хүний зам дээр буюу нийтийн эзэмшлийн талбай дээр том оврын автобус зогсож, иргэдийг багагүй бухимдуулаад авчээ. Улмаар тухайн үед эргүүлд гарч байсан замын цагдаа тухайн автобусны жолоочтой уулзаж, дүрэм журмыг нь танилцуулсан байна. Ингээд тухайн автобусны жолоочийн бичиг баримтыг шалгаад зогсож байтал такси барихаар зогсож байсан иргэн уг замын цагдаатай ам зөрсөн талаарх мэдээлэл цахим хэвлэлээр нэлээн шуугиан тарьж байна.

  Тэгвэл уг иргэний хэлж буйгаар эл замын цагдаа нь байж боломжгүй авир гаргаж, золтой л  бяцхан хүүтэй нь хамт ачуулчихсангүй гэнэ. Харин энэ талаар Замын цагдаагийн газраас залруулга хийж энэ цагдаа нь ямар ч гэм зэмгүй мэтээр тайлбарлаж байгаа юм. Гэвч иргэд цагдаа нарын харьцааны соёлгүй байдлыг ихээр шүүмжилж, бухимдлаа илэрхийлэх боллоо. Юутай ч төрийн албанд ажилладаг цагдаа хүн иргэдийн төлөө, нийгмийн амар амгалан байдал, шударга ёсны төлөө ажил үүргээ гүйцэтгэх ёстой. Гэвч Замын цагдаа нар ингэж иргэдийг үг хэлээр доромжилж, ажил мэргэжлээрээ далайлгаж байгаа нь яахын аргагүй шүүмжлэх зүйл юм. Улмаар санал сэтгэгдлээ цахим хуудсаараа илэрхийлсэн уг эмэгтэйг дуудаж байцаах гэж байгаа нь ч хэр зохимжтой юм бол оо. Эрх мэдэл, албан тушаалаараа далайлгаж байгаа иймэрхүү цагдаа нарт салбарынх нь сайд хийгээд дарга, удирдлага нь хариуцлага тооцох хэрэгтэй гэдгийг иргэд шаардаж байна.