Чихэр жимс тоглоом наадмаар дүүрэн "Хүүхдийн баяр" болоход хоёрхон хоног үлдлээ.

Монголчууд бид тэртээ 1953 оноос энэхүү баярыг тэмдэглэж эхэлсэн бөгөөд энэ өдөр дэлхий нийтээрээ хүүхдийн эрхийг хамгаалах асуудалд анхаарал хандуулдаг уламжлалтай. 1995 оноос энэ өдрийг  “Эх үрсийн баяр” болгосон боловч зарим тодорхой шалтгааны улмаас 2003 оноос эргүүлэн Хүүхдийн баяр болгон тэмдэглэсээр өнөөг хүрчээ.

Сүүлийн жилүүдэд энэ өдрийг тэмдэглэх хүрээ өргөжин тэлж байгаа бөгөөд үүнийг олж харсан ХАХНХ-ын сайд С.Эрдэнэ нэгэн саналыг дэвшүүлэхээр болжээ.

Тодруулбал тэрээр хүүхдийн баярыг “хүүхэд, гэр бүлийн баяр” болгох саналыг Засгийн газарт оруулах бодолтой байгаа гэнэ. Энэ тухайд тэрбээр “Хүүхдийн гэсэн тодотголтой энэ баярыг бид олон жил тэмдэглээд хэвшчихсэн. Би энэ баярыг гэр бүлийн баяр байх ёстой гэж боддог. Хүүхэд бол гэр бүлийн баяр баясгалан, аав, ээжийн сэтгэлийн нар, чимэг нь байдаг. Тийм учраас хүүхдийн энэ баяр гэр бүлийн баяр байх ёстой. Уг нь өнгөрсөн жил санал оруулж байсан ч олигтой тайлбарлаж чадаагүй. Тиймээс цаашдаа нэршлийг нь өөрчилж “Хүүхдийн баяр” биш “Хүүхэд, гэр бүлийн баяр гэж өөрчилье гэсэн саналыг дахин тавих бодолтой байгаа. Мэдээж баяр гэдэг утгаараа хүүхдийг нийгмийн анхаарлын төвд оруулж байгаа. Тийм болохоор хүссэн хүсээгүй ч хүүхдийн эрхийн асуудал заавал яригдана” гэжээ.