Өнөөдөр Олон улсын хүүхдийн эрхийг хамгаалах өдөр.

Анх 1924 онд “Хүүхдийн эрхийн тухай” тунхаглал Женевт батлагдаж байжээ. Үүний дараа 1959 оны  арваннэгдүгээр сарын 20-ны өдөр НҮБ-ын Ерөнхий Ассамблей “Хүүхдийн эрхийн тунхаглал”-ыг баталсан байна. Энэ тунхаглалд “Хүүхэд нь бие бялдрын болон оюун ухааны хувьд төгс боловсроогүй байдлыг харгалзан түүнийг төрөхийн өмнө ч, төрсний дараа ч тусгай асрамж, хамгаалалтыг, үүний дотор эрх зүйн зохих хамгаалалтыг шаарддаг” гэж заасныг НҮБ анхааралдаа авч хүүхдийн эрхийн тусгай конвенц байх шаардлагатай хэмээн үзсэн байна. Ийнхүү Хүүхдийн эрхийн конвенц 1989 оны арваннэгдүгээр сарын 20-нд НҮБ-ын Ерөнхий Ассамблейн чуулганаар батлагдаж, түүнд дэлхийн 191 орон нэгдэн орсон нь эдүгээ хамгийн олон оронд хүлээн зөвшөөрөгдсөн конвенц болжээ.

Харин Монгол Улс 1990 онд Хүүхдийн эрхийн конвенцид нэгдэн орж, Хүүхдийн эрхийг хамгаалах тухай хуулийг боловсруулсан байна. Энэ хуулийг тавдугаар сарын 8-нд баталж, зургадугаар сарын 1-ний өдрөөс мөрдөж эхэлсэн аж.

Энэ өдрийг 1995 оноос "Эх үрсийн баяр" хэмээн тэмдэглэж байсан ч тодорхой шалтгааны улмаас 2003 оноос эргүүлэн Хүүхдийн баяр болгожээ.