Өнгөрсөн амралтын өдөр Монголд банкны салбар үүсч хөгжсөний 90 жил, Аварга цолтой бөхөд хүндэтгэл үзүүлэх барилдаан ихээхэн дуулиантай болж өндөрлөв. Учир нь Уг барилдаанд түрүүлсэн аварга С.Мөнхбат үзүүрлэсэн харцага Ц.Содномдоржийн толгойруу цохиж нэдэрсэн явдал ихээхэн асуудал үүсгэх нь тодорхой боллоо. Өөрөөр хэлбэл аварга С.Мөнхбат түрүүлэхдээ харцага Ц.Содномдоржийг унагасныхаа дараа толгой руу нь цохиж, нэдэрсэн нь олон түмний сэтгэлийг гонсойлголоо. Аварга цолтой бөх аваргууддаа хүндэтгэл үзүүлэх барилдаанд ард түмний нүдэр дээр, аваргуудынхаа дэргэд жудаггүй зан гаргав.

    Энэ барилдаанд үзүүрлэсэн Ц.Содномдорж өмнө Улсын гарьд Б.Гончигдамбын гарыг хөшиж дөрвөн сар барилдах эрхээ хасуулсан юм. Тэрээр дөрвөн сар барилдалгүй байж байгаад энэ амралтын өдөр барилдаж үзүүрлэхдээ аварга С.Мөнхбатад нэдрүүлсэн хэрэг. Дөрвөн сар барилдалгүй байж байгаад үзүүрлэнэ гэдэг бол Ц.Содномдорж харцагын хувьд сайн бөх гэдгээ ард түмэндээ харуулав. Бас толгойруугаа цохиулчихаад нэг их хэрүүл хийлгүй гайхаад өнгөрөхөд өмнөх шийтгэл нь ч нөлөөлсөн байх.

    Хэрэв МҮБХ-ны шийдвэр бүх л бөхчүүдэд адилхан үйлчилдэг бол, шударга шийдвэр гаргаж чаддаг бол Улсын аварга С.Мөнхбатад шийтгэл ногдуулах ёстой гэж бөхийн хорхойтнууд ярилцах болжээ. Учир нь гар хөшсөн бөх дөрвөн сар барилдах эрхээ хасуулдаг бол хүний толгойруу цохиж, нэдэрсэн аварга хүнд адилхан шийтгэл ногдуулах ёстой гэх ард иргэдийн тоо ч нэмэгдлээ. МҮБХ аварга бөх гэж алаг үзэхгүй бол адилхан шийтгэл ногдуулах нь зүй ёсны хэрэг л дээ. Тэр ч бүү хэл бүхий л бөхийн манлай аварга хүн гэдэг утгаар нь илүү шийтгэл ногдуулсан ч ард түмэн гайхахгүй.

    Тэгээд ч аварга бөх өрөвч нинжин сэтгэлтэй, бүхий л бөхчүүддээ үлгэр дууриал болдог, ёс суртахууны өндөр үлгэр жишээ болдог, аварга бөхөөр Монголын бөхийн үнэ цэнэ үнэлэмжийг хэмждэг гэж олон хүн ярьдаг. Ийм утга агуулгатай яриаг өмнө Х.Баянмөнх, Ж.Мөнхбат, Д.Цэрэнтогтох, Б.Бат-Эрдэнэ, А.Сүхбат, Г.Өсөхбаяр, Д.Сумъяабазар, Г.Эрхэмбаяр гээд бүхий л аваргууд ярилцлага, дурсамжидаа өгүүлсэн байдаг. Ард түмэн ч тийм байхыг хүсдэг. Харамсалтай нь аварга С.Мөнхбат тэгж чадсангүй. Тэр ч бүү хэл аваргууддаа хүндэтгэл үзүүлэх барилдаанд бага цолтой бөхөд дээрэнгүй хандсан нь олон хүний дургүйцлийг төрүүллээ. Түүний барилдааныг Дархан аварга Д.Цэрэнтогтох, Далай аварга А.Сүхбат, Г.Өсөхбаяр, аварга О.Балжинням, Г.Эрхэмбаяр гэх мэт аваргууд харж суусан. МҮБХ-ны удирдлагууд ч индэр дээр сууж харагдсан.

    Тиймээс МҮБХ-ны дүрэм алагчилдаг уу? адилхан үйлчилдэг үү? гэдэгт хариу өгөх үйл явдал болж өнгөрөв. МҮБХ аварга гээд толгойг нь илээд өнгөрөх үү? адилхан шийтгэл оногдуулах уу? гэдгийг ард түмэн харж байгаа.