Манай сайт 2014 оны 05-р сарын 27-ний өдөр “Б.Хурц энхэрийнх нь салонд 100 саяын акт тавьсанд өширхөж Д.Энхбатыг хэлмэгдүүлсэн үү?” гэсэн нийтлэлийг Д.Энхбатын гэргий Д.Охиноогийн хэвлэлд өгсөн ярилцлагыг эх сурвалж болгон асуудал дэвшүүлж бичсэн болно.

Үүнтэй холбоотойгоор “Сарнайх” ХХК-д зуун саяын татварын акт тавигдаагүй” болохыг нотлосон татварын байгууллагын тодорхойлолтыг манай сайтад хүргүүлснийг мэдээллийн тэнцвэрт байдлыг хангах үүднээс уламжилж байна. Тус компанид 2005-2009 оны татварын ногдуулалт, төлөлтийн байдалд Татварын байгууллагаас шалгалт хийж 11147.1 мянган төгрөгийн, 2009-2012 оныг дуустал 1000.0-1200.0 мянган төгрөгийн хүү, акт тавигдсаныг төлж барагдуулсан байна.

Уг нийтлэлийн улмаас “Сарнайх” компаний бизнесийн үйл ажиллагаанд хүндрэл учирсанд хүлцэл өчье.

Дээрхи нийтлэл нь Манай Улсын нэгдэн орсон “Хүний эрхийн түгээмэл тунхаглал” “хэвлэлийн эрх чөлөөний харти”-д заасанчлан “мэдээллийг дамжуулах” эрхийн хүрээнд хийгдсэн үйл ажиллагаа бөгөөд мэдээллийн үнэн бодитой эсэхэд тухайн эх сурвалж хариуцлага хүлээх хууль эрх зүйн зарчим Монгол Улсад үйлчилдэг.

Сэтгүүлчид ямарваа мэдээллийн эх сурвалжид тулгуурлан асуудал дэвшүүлэх эрхтэй бөгөөд үүнд холбогдох эрхэм этгээдүүд өөр өөрсдийн тайлбарыг баталгаажуулж ирүүлбэл манай сайт аль нэг талын байр суурийг баримтлахгүйгээр мэдээллийг   тэнцвэртэй түгээж ажиллана.